Entama un eventu deportivu de gran sonadía, el Mundial de Fúbol 2014,
qu’esti añu va celebrase nel país de Brasil. El poder mediáticu, los
grandes monopolios comerciales y otres instancies de poder
económicu, políticu y social nun aparen de da-y difusión a esti eventu y
aprovechar esti campeonato deportivu pa incrementar los beneficios de
la oligarquía y l’imperialismu. Al mesmu tiempu entama nel Reinu
d’España una campaña mediática que trata de sacar el nacionalismu
español al travíes d’un equipu de fúbol, que paez que ye l’únicu recursu
identitariu que puede presentar l’españolismu.
En Darréu, la Mocedá d’Izquierda Soberanista d’Asturies queremos denunciar la fola españolista que vamos sofrir los pueblos oprimíos demientres estes selmanes. La instrumentalización ideolóxica del mundial de fúbol ye un vezu yá dende hai dellos años nel Estáu Español, lo qu’espeya la debilidá del nacionalismu español y los valores supuestamente patrios qu’inspira esti Réxime de 1978.
Pero lo más grave a lo que tamos asistiendo estos díes y enllegando esti eventu ye lo que ta pasando nes cais del país carioca, el cual organiza esti Mundial 2014. Los movimientos sociales y tolos seutores braeramente progresistes tan echaos a la cai pa protestar polo qu’entienden que ta siendo una estafa a tol Pueblu de Brasil: demientres nun hai perres pa servicios públicos nin se garantiza la calidá de los mesmos hai dinero públicu asgaya pa financiar el remocique y construcción d’instalaciones deportives qu’executen entidaes privaes.
Los fuelgues y les movilizaciones nun aparen pero dende los medios del capital siguen enfotaos en vendenos que lo que se ta xugando en Brasil ye un mundial de fúbol. La represión política o sindical ye otra constante. Día tres día xente ye detenía, encarcelada o torturada nesti país d’America del Sur d’una forma arbitraria o bien por motivos políticos ya ideolóxicos. Eso dende la mocedá consciente d’Asturies paeznos muncho más importante qu’un campeonatu deportivu.
La prensa occidental recueye ente les sos informaciones la mala organización del eventu deportivu o d’una forma más minoritaria les fuertes protestes que se tan desendolcando, pero ye ciertu ya innegable que tapecen una realidá vergoñosa y que nun se puede tolerar. La probitú, la exclusión social y la miseria d’un pueblu al cual los poderes socioeconómicos y políticos tan llevando a la muerte.
Nes cais de Brasil la policía ta asesinando a neños y neñes pol simple fechu de durmir na cai, yá que paez que quier ufrir una imaxe mui distinta a la comunidá internacional de lo que ye’l país. Por supuestu l’imperialismu y los poderes económicos d’occidente son responsables principales de la situación del Pueblu Brasileñu, pues estes son les situaciones que se xeneren cuando se caltienen dinámiques de dominación sobre países que recuerden a la época colonial.
Dende Darréu queremos denunciar polo tanto lo que pasa en Brasil como mozos y moces de conciencia y moral que somos. Los que nun tiene principios éticos o morales podrán atalantar lo que pasa nel país carioca. Nós nun podemos. Poro, nesti mundial nun vamos con nenguna seleición, vamos col Pueblu Brasileñu. Vamos colos neños de les faveles que nun tienen pa comer, coles menores d’edá que vense forciaes a prostituyise pa poder vivir, colos mozos que’l gobiernu ta encerrando y asesinando pol fechu de durmir na cai y “dar mala imaxe”. Col pueblu rebelde que nun dobla la rodiella énte esti despropósitu y llucha nes cais por un Brasil más xustu, prósperu y llibre.
Por ello llamamos a la conciencia de la mocedá asturiano y creemos que ye responsabilidá de toos y toes espardir esti mensaxe críticu y claro con esti eventu y tolo que lu arrodia. Nengún deporte tien la culpa de que se dean atrocidaes como les que se tan dando en Brasil, precisamente los deportes inspiren valores de cooperación, nobleza, tolerancia o solidaridá. Por ello creemos qu’hemos de deprender del deporte y puxar por estos valores. Y la meyor forma de puxar por ello ye puxar pol Pueblu Brasileñu, en combate contra tanta barbarie.
Asina entendemos que
la responsabilidá y la solidaridá apunten a que pasemos d’esti eventu
deportivu, mercantilizáu ya ideoloxizáu a más nun poder, y tratemos
d’espardir lo que realmente pasa en Brasil.
L’únicu rival ¡ye’l capital!
¡Asturies col Pueblu Brasileñu!
No hay comentarios:
Publicar un comentario