¿Qué ta pasando?
El pasáu dos de xunu Juan Carlos I, Rei d’España, anunció la
so abdicación depués de preparar l’anuncia y el procesu dende hai dellos meses.
L’actual xefe del Estáu Español, que foi escoyíu pol dictador Francisco Franco
dexará d’exercer como tal el prósimu 19 de xunu. Esi día el so fiu pasará a ser
Rei d’España col nome de Felipe VI y nel horizonte también ta que la infanta
Leonor seya proclamada Princesa d’Asturies.
Dende toles estayes de poder ta promoviéndose’l procesu como
una segunda transición, continuadora de la primera, la cual culminó cola
consecución del Réxime de 1978 baxo’l que vivimos anguaño. Dende los medios de
comunicación, los partíos políticos del Réxime y otres estayes, como los
círculos d’empresarios, ta faciéndose un llabor constante de llimpieza de la
imaxe del rei Juan Carlos I. Amás ta presentándose la prósima coronación de
Felipe VI como un nuevu periodu de cambiu pa tola población.
Solliñar que namái conocese la noticia de l’abdicación los
pueblos del Estáu Español echáronse a la cai. Millones de persones salieron a
la cai en tol Reinu d’España dende distintes posiciones o idees pero col mesmu
envís: el refugu a la monarquía española y la so continuación. Hai voces que
reclamen un referéndum pa decidir que modelu d’Estáu se quier, otres apuesten
pol pasu direutu a la República Española, otres por una República Española pero
de calter socialista y otres piden l’autodetermín o la independencia respeutu
al Estáu dende una perspeutiva republicana.
Énte estes movilizaciones, que piden unos mínimos
democráticos nel so conxuntu los representantes del status quo nel Reinu d’España y Asturies amosaron una vegada más la
so natura inmovilista y antidemocrática. Dende la mayoría de los partíos y
dende’l poder económicu zarráronse en banda en favor del sistema monárquicu de
1978 y del procesu de socesión, refugando cualesquier pidimientu popular y
democráticu de los que se lleven díes faciendo.
El republicanismu
n’Asturies.
Ye evidente que n’Asturies l’españolismu ye parte del discursu
dominante y esi nacionalismu español ta venceyáu al poder socioeconómicu que
gobierna’l país, bien con organizaciones empresariales o bien colos
representantes políticos d’esa oligarquía n’Asturies. Tamién ye ciertu qu’ente
los seutores populares de marcáu calter republicanu, hai espresiones
españolistes de dicho republicanismu.
Les movilizaciones republicanes de los caberos díes espeyen
na mayoría los casos qu’una bona parte de los seutores populares asturianos
apuesten por una III República Española, anque con munchos matices sobre lo que
supondría esa República o munches formes d’interpretala. La izquierda asturiana
ye obviamente republicana, yá seya dende posiciones nacionales o estatales.
Ciertamente la izquierda asturianista o soberanista nun quedo
al marxe de l’abdicación. Dende’l primer momentu pudimos asistir a llectures en
clave asturiana sobre’l procesu y nes movilizaciones republicanes participaron
munches persones militantes de la izquierda soberanista o que simpaticen
abiertamente col movimiento políticu mentáu. Estes persones u organizaciones ven más allá d’un horizonte españolista o en
clave estatal, yá seya baxo principios monárquicos o republicanos, y fueron
axentes activos a la hora de convocar al Pueblu estos díes.
Esto evidencia la necesidá qu’hai nestos momentos d’axuntar
voluntaes y llegar a consensos ente la izquierda qu’hai nel país de nueso. Les
movilizaciones han de ser hestóriques y nun se pueden repetir dinámiques del
pasáu, onde una corriente somorguiaba a otra baxo’l so discursu y sobremanera’l
so marcu d’actuación. L’oxetivu nesti monentu ye acabar col Réxime de 1978 y
esto va muncho más allá d’un conflictu ente Monarquía (y Principáu) o
República.
Poro, les movilizaciones en clave españolista nun son el
camín nesti momentu pa naide. Entendemos dende la Mocedá d’Izquierda
Soberanista – Darréu – que si se quier acabar col Réxime de 1978, entamando
pola monarquía, lo fundamental ye la unidá popular con unes manifestaciones
teóriques y practiques onde toos y toes entremos dientru contra l’enemigu común
que ta bien definíu pa nós. Ta nidio eso si qu’algamar esti consensu lleva
implícitu’l fechu d’asumir determinaes cuestiones, como’l partir del contextu
asturianu, onde la dominación monárquica tien unes manifestaciones propies (imposición
d’un Reinu pero tamién d’un Principáu).
Hai que puxar por un tipu d’oposición al procesu de socesión
na corona española onde toos y toes podamos participar ensín arrenunciar a los
nuesos posicionamientos o marcos d’actuación pero nenguna entidá o persona se
sienta incómoda o en segundu planu. Poro, la xenerosidá y la responsabilidá son
fundamentales nel momentu presente na izquierda asturiana si queremos da-y una
rempuesta organizada, masiva y representativa a esti procesu que los que manden
bautizaron como “la segunda transición”.
La Posición de la
Moceda d’Izquierda Soberanista.
Dende Darréu empobinamos una serie de consignes propies
nesti momentu presente que refuercien les nueses tesis y posicionamientos:
- Rotura democrática: ye fundamental enantes de nada acabar col Réxime de 1978, un Réxime que namái supunxo p’Asturies la desarticulación de tolos nuesos recursos productivos, la imposición cultural y llingüística y una etapa de situación predemocrática permanente. La reforma del Réxime dictatorial anterior supunxo qu’Asturies fuera secuestrada por un sucursalismu vendíu a los dictaos del capital y del Reinu d’España. L’Estáu Español nun supón más que miseria y negación de futuru pa la mocedá asturiano. Ye fundamental empobinar un procesu que desgaste’l marcu presente y seya quien a facer una ruptura democrática que de verdá suponga la superación d’esti estáu de les coses. Nesti sen nun son válides reformes d’esti mesmu Réxime nin podemos aceutar como compañeros de viaxe a quienes empobinen una reforma en cuenta d’una ruptura
- Procesu constituyente: la ruptura de la que falamos tien de tener una traducción en positivu, en clave de construcción. Dende Darréu llevamos años falando de que a esti Pueblu Asturianu pruye-y llevar alantre un procesu constituyente pa superar l’actual status quo y empobinase a un mañana meyor. Esi procesu constituyente tien d’esistir pa superar les formes de dominación y opresión que sufre’l Pueblu Asturianu. Amás esti procesu tien de ser desendolcáu en tou momento pola clas obrera y los seutores populares n’Asturies. La mocedá tien de tener una importancia fundamental nesta xera. Ye evidente tamién qu’Asturies ye un país pequeñu y nun vive aisláu o al marxe nel mundo y toa dinámica social tien unes consecuencies dientru y fuera de les nueses llendes. Poro, nesti procesu constituyente la conquista de los drechos sociales y nacionales son claves pero tamién l’internacionalismu y la defensa de la soberanía de los pueblos.
- República Asturiana: nel horizonte de la Mocedá d’Izquierda Soberanista nun cabe más oxetivu que la construcción de la República Asturiana y dientru del procesu de desgaste del Réxime dende Darréu nun podemos arrenunciar al republicanismu asturianu. Un republicanismu al que-y queda muncho por andar y que tien de ser de calter socialista y como ye obvio soberanista.Frenti a la monarquía española nós apostamos pol progresu y la soberanía y llibertá del nuesu pueblu, por eso apostamos y lluchamos pola República Asturiana. Queremos algamar la República Asturiana pa cámbialo too, pa qu’Asturies tea en manes de los asturianos y les asturianes y el poder políticu y económicu tea al serviciu de la xente, de les necesidaes del Pueblu Trabayador Asturianu
N’Asturies a seis de
xunu de 2014 – Darréu Mocedá d’Izquierda
Soberanista
No hay comentarios:
Publicar un comentario