viernes, 18 de julio de 2014

Comité Asturianu de Solidaridá cola Ucrania Antifacista




Vien de constituyise'l Comité Asturianu de Solidaridá cola Ucrania Antifacista. Dende Darréu saludamos y participamos d'esta iniciativa que consideramos perimportante, pa espeyar dende los valores del antifacismu, l'antiimperialismu, l'internacionalismu y'l drechu d'autodetermín de los pueblos la solidaridá del pueblu trabayador asturianu pa cola Ucrania antifacista. Esti ye'l manifiestu del Comité:

Nos últimos meses fuimos testigos del golpe d'estáu y la Guerra Civil n'Ucrania orquestada poles potencies imperialistes de primer orde, la XE (Xunión Europea) y los EEXX. Ante la crisis económica que solmenó'l sistema, la burguesía monopolista, per mediu de les fuerces de choque facistes, crearon el clima perfectu pal trunfu de la reaición (Euromaidan) y la instauración d'un réxime beneficiosu a los sos intereses. Les matances asocédense una tres otra col beneplácitu institucional de les potencies imperialistes, peracabando'l golpe d'estáu per mediu de brutales ataques contra'l pueblu ucranianu. Cómo últimos exemplos de la represión carecía poles rexones antifacistes tenemos el bañu de sangre asocedíu n’ Odessa o'l bombardéu sobre civiles na rexón de Lugansk. En rempuesta al trunfu de la reacción en Kiev creáronse Milicies Antifacistes y xunto cola mesma, resistencia popular activa nes rexones Sur y Esti del país. Como resultancia última de la resistencia antifascista les provincies de Lugansk y Donetsk independizáronse d'Ucrania. Na llucha pol autodetermín dambes rexones xuniéronse nel Estáu Federal de Nueva Rusia siguiendo asina'l procesu d'emancipación de la Ucrania facista que caltien l'asediu y bombardéu d'estes rexones.

Los y les trabayadores ucranianes tán siendo sometíes a la opresión de la reaición facista y a les midíes económiques orquestaes polos intereses del FMI, el Bancu Mundial y la XE, so los sofitos fácticos de la OTAN y EEXX. El nuesu deber como internacionalistes implica la necesidá de la xunión y de la cooperación ente los pueblos de tol mundu contra la opresión capitalista y la reaición. Ye por ello que como clase trabayadora asturiana nun podemos abandonar a los nuesos hermanos/es ucranianes na so llucha. Tenemos que retomar l'espíritu internacionalista de la solidaridá de tolos/es trabayadores de tolos países, yá que la so llucha ta xunía a la nuesa.

La nuesa obligación como parte d'un Estáu plurinacional que viola'l llexítimu derechu d'autodeterminación de los pueblos y como pueblu afectáu poles midíes económiques de la XE, ye sofitar tanto los procesos d'autodeterminación que se tán asocediendo, como defender y solidarizanos cola población civil atacada y coles sos fuerces d’autodefensa en toa Ucrania. Recuperemos l'espíritu de les Brigaes Internacionales qu'en 1936 allegaron en defensa de la República frente al fascismu o del Socorru Colloráu Internacional qu'amosó'l so sofitu na revolución d'Ochobre n’ Asturies. Nun podemos escaecer qu'enfrentámonos a la vieya solombra del facismu. Debemos, poro, organizanos pa llevar la ofensiva ideolóxica y tar preparaos pa refugar los sos emburriones.

Pola necesidá de combatir el facismu como una espresión política más del imperialismu, pol sofitu a los procesos d'autodeterminación de los pueblos y pol espíritu internacionalista que tien que guiar a la clase obrera; Ucrania precisa la nuesa ayuda. Por tou ello, el Comité Asturianu de Solidaridá cola Ucrania Antifascista, llama a la cooperación de los distintos grupos ya individualidaes antifacistes y anticapitalistes d’ Asturies nuna plataforma en solidaridá cola Ucrania Antifacista. Buscamos nello l'intercambiu d'información, compensar la manipulación mediática imperante, faer ver que la llucha antifascista ye una espresión más de la llucha de clases y el sofitu direutu solidariu coles rexones afeutaes.

Los principios del comité, basáu na llucha antifacista, antiimperialista ya internacionalista podríen resumise en:


• Señalar la necesidá de combatir el facismu en toles sos espresiones como fuerza de choque del imperialismu.
• La planificación d'aiciones divulgatives de solidaridá internacionalista, campañes y actividaes contra la desinformación institucional.
• La necesidá de la solidaridá política pola autodeterminación de los pueblos.
• Estructurar un trabayu políticu que señale'l papel que tienen en toos estos procesos la OTAN, la XE y EEXX como promotores y cómplices del golpe d'Estáu fascista y de les matances de civiles y milicianos antifascistes.
• Fortalecer un marcu xunitariu de llucha antiimperialista.

¡NUN PASARÁN!

No hay comentarios:

Publicar un comentario