La mocedá escontra'l Festival Aériu de Xixón.

Un añu más la ciudá de Xixón acueye'l Festival Aériu, eventu financiau col dineru públicu de toos y toes y que'l gobiernu llocal, nesti casu de FORO, promociona pente la xente "a calzaor". Esti supuestu festival cada añu recueye más refugu ente'l Pueblu de Xixón y d'Asturies pero esti refugu ye inoráu polos políticos qu'empobinen l'eventu.

Dende la Mocedá d'Izquierda Soberanista refugamos la cellebración del Festival Aériu de Xixón de forma clara. Nun podemos entender cómo en tiempos tan duros como los que tamos viviendo se destinen tantos fondos públicos pa un eventu militarista como esti. Con una situación socioeconómica como la que se vive en Xixón y Asturies dende Darréu entendemos que ye vergoñosu que se destinen perres pa estes cuestiones.

Per otru llau nun ye razonable qu'una ciudá como Xixón, qu'aguantó tantos bombardeos en 1934 o 1937, faiga homenaxe a unidaes militares aéries que bombardearon la ciudá. Amás esti tipu d'eventos son una forma de canalizar la inculcación ideolóxica del españolismu o'l militarismu más xabaz. Que l'imperialismu colos sos aviones de la muerte venga a la nuestra patria a facer un actu d'autoestima y ostentación ye una vergoña, más cuando aviones d'esti tipu tan bombardeando a civiles en pueblos como Palestina.

¡Festival aeriu de Xixón NON!