17 y 18 d’ochobre: Día de la Mocedá Revolucionario 2014

L’ochobre d’esti añu 2014 ye bien simbólicu pa la mocedá soberanista asturiano: va cumplise l’ochenta aniversariu de la revolución d’ochobre de 1934, asina como’l décimu dende’l surdimientu de Darréu.

Ye por ello que dende la Mocedá d’Izquierda Soberanista retomamos el DMR (Día de la Mocedá Revolucionario), qu’un añu más va a cuntar con una doble vertiente: la formativa, divulgativa, de concienciación, reivindicación etc, al traviés de delles charres, alderiques, y otres actividaes; asina como’l clásicu conciertu “Asturies Nun Escaez”.

Darréu escueye Uviéu como enclave nel que van a desendolcase toes estes actividaes del DMR 2014, que tendrá llugar los díes 17 y 18 d’ochobre (vienres y sábadu), y pal que la mocedá soberanista y combativo alcuéntrase trabayando col enfotu de facer el meyor homenaxe y reivindicación posible d’estos fechos hestóricos, de les esperiencies sociales a estrayer, y de la so vixencia en plena ofensiva capitalista anguaño.

Próximamente diremos asoleyando tanto les actividaes concretes, como los grupos que conformarán el cartelu d’un conciertu nel que yá podemos adelantar qu’habrá surprieses perprestoses. ¡Acutái les feches!

PUXA LA REVOLUCIÓN D’OCHOBRE’L 34

PUXA ASTURIES LLIBRE Y SOCIALISTA

ASTURIES NUN ESCAEZ