viernes, 1 de agosto de 2014

Clases de toréu pa neños: apoloxía del maltratu animal y aculturización





Dende Darréu  queremos espresar el nuesu refugu a la organización, un añu más, d’una “clase de toréu pa neños”, que va tener llugar na Playa San Llorienzu coincidiendo cola Feria de Begoña en Xixón.

Ye ésti un capítulu más de la promoción y puxu por parte l’Ayuntamientu Xixonés d’eventos qu’esparden “valores” como’l maltratu animal, el militarismu, l’españolismu…, pero esti casu concretu ye entá más grave si tenemos en cuenta’l receptor al que va empobináu: la población más mozo.  Nesa llinia, dende la Mocedá d’Izquierda Soberanista señalamos les dos vertientes principales de denuncia d’esta cuestión: l’apoloxía del maltratu animal, y l’aculturización españolista.

Ye inalmisible que dende l’Ayuntamientu non solo se permita, sinon que se-y dea sofitu a cualquier actividá cola que “deprender” a neños y neñes a maltratar a un animal. La tauromaquia nun ye cultura, ye un elementu a erradicar del nuesu país.

De la mesma forma, ye tamién inalmisible l’aculturización españolista implícita nesti tipu d’actividaes, una vertiente más de les múltiples nes que se desendolca esta actulturización: feries d’abril, deturpación cultural al traviés de la TV pública asturiana, marxinación y represión d’espresiones culturales propies, etc.

Poro, entendemos que l’interés de la Casa Conseyu por caltener con vida, gracies a sovenciones, la tauromaquia  en Xixón –qu’añu a añu amosa l’escasu seguimientu que xenera nel pueblu asturianu- y actividaes derivaes d’esta, como les clases de toréu, tien la so principal desplicación nesti elementu d’esparder determinaos valores venceyaos al poder políticu y económicu que mos rixe:  españolismu, maltratu animal, militarismu, machismu etc.

ASTURIES ANTITAURINA

No hay comentarios:

Publicar un comentario