jueves, 4 de septiembre de 2014

Darréu llama a la mocedá asturiano a participar na manifestación unitaria del 8 setiembre



Un añu más l'8 setiembre espeya nel nuestru país dos visiones d'Asturies bien contrapuestes. Per un llau la visión institucional, remanada pol sucursalismu y qu'ufre una visión d'Asturies folclorica, idílica y que defín al nuestru país como una rexón periférica y venceyada al españolismu, pa lo qu'emplega los mitos cuadonguistes más rancios. Per otru llau una Asturies que nun se rinde, qu'apuesta por sí mesma y pol so Pueblu pa construyir un país xustu, más llibre y que nun s'avergoña de la identidá nacional asturiana. 

Dende la Mocedá d'Izquierda Soberanista que representa Darréu entendemos que la mocedá asturiano tien d'escoyer esa nueva Asturies que quier construyise a sí mesma con soberanía, xusticia y llibertá. Esa Asturies rebelde que quier decidir y nun quier tar secuestrada polos intereses de la oligarquía española. Una Asturies digna y lluchadora que se moviliza pa siguir alendando y que por ello tien d'enfretase a esa Asturies provinciana, centraliega y afitada nel Réxime corrupto y podre de 1978. 

Asina, dende Darréu entendemos que l'8 de setiembre n'Asturies nun tamos pa fiestes y que la movilización conxunta qu'empobina la izquierda soberanista n'Uviéu ye'l llugar d'alcuentru d'eses moces y esos mozos que siguimos apostando por un futuru dignu nel nuestru país. Poro, llamamos a la mocedá asturiano a participar na manifestacion unitaria que saldrá dende'l Paséu de los Álamos d'Uviéu a les 12:30 h col llema "Pa tresformar Asturies #LluchandoPolaSoberanía".

 La mocedá asturiano tien dos opciones: la rebelión o la sumisión al sucursalismu capitalista que plantega Madrid y los sos axentes afincaos n'Asturies, bien conocíos por toes y toos. Asina entendemos qu'esti 8 de setiembre tien de convertise nel día en que la vindicación de soberanía política y económica ye'l camín d'Asturies énte tanta imposición ayena a los intereses de los trabayadores d'esti país. 

El camín d'Asturies ye'l de la soberanía y el socialismu. Los niveles de miseria a los que tamos llegando col secuestru de la nuestra soberanía como pueblu a los intereses del capital son intolerables y asina queremos dexalo claro nesti 8 setiembre. Nin la Unión Europea, nin el Reinu d'España, nin los axentes del españolismu que tenemos na Xunta Xeneral del Principáu busquen el bientar y futuru del Pueblu Trabayador Asturianu.

 L'alternativa rupturista col Réxime del 78 pasa por Asturies y pasa pola construcción de la unidá popular afitada nel socialismu, el soberanismu y el feminismu. Dende Darréu queremos agradecer publicamente l'enfotu que se ta dando n'Asturies na construcción d'un movimientu sociopolíticu que parta d'estos presupuestos y creemos que ye'l momentu d'axuntanos na cai y tamién d'aldericar y sentar les bases d'esi futuru movimientu popular que tien de llegar a esta Asturies tan esfarrapada pol capitalismu, les traiciones de la izquierda más reformista y el sucursalismu cuasi qu'esclavu que gobierna Asturies dende hai décades.

Nesti 8 setiembre vamos a Uviéu. ¡Siguimos lluchando pola soberanía!

¡Puxa Asturies llibre!

No hay comentarios:

Publicar un comentario