martes, 9 de septiembre de 2014

Esti 8 setiembre lluchamos pola soberanía pa tresformar Asturies

Esti 8 setiembre la Mocedá d'Izquierda Soberanista participó na manifestación unitaria de la izquierda soberanista que percorrió les cais d'Uviéu. Cientos de persones salieron a la cai pa siguir #LluchandoPolaSoberanía col envís de tresforma Asturies de forma global. Na movilización hebo delles paraes temátiques onde distintes persones y coleutivos tresmitieron a los asistentes la situación del estudiantáu asturianu, la mocedá, la muyer, el mundu rural, la clas trabayadora, etc. 

La manifestación acabó na Plaza'l Paragües de la capital asturiana con un actu políticu y una bona folixa, con espicha, música y xuegos tradicionales pa toes y toos. Darréu participó na movilización pol so calter unitariu, nidiamente soberanista y social y fiximos una intervención énte l'Edificiu Hestóricu de la Universidá d'Uviéu onde falamos de la precaria situación de la mocedá asturiano. Nesta intervención participamos de forma conxunta cola Xunta Estudiantil Asturiana, coleutivo que tocó más la situación del enseñu. Tamién un compañeru de Darréu intervino nel actu políticu valorando de forma positiva la iniciativa d'esti 8 de setiembre y llamó a la mocedá ellí presente a construyir otra Asturies, una Asturies independiente dafechu. 


Per otru llau tuvimos col nuestru puestín d'información y material na Plaza'l Paragües que tuvo gran ésitu. Queremos agradecer nesti sen el sofitu de tola xente que contribuyó a la nuestra autoxestión. Tamién queremos agradecer l'esfuerciu a tola xente que fixo qu'esti 8 setiembre fuera un día de movilización xunitaria y llamamos a toles persones militantes y simpatizantes de la izquierda soberanista a siguir axuntando voluntaes de cara a construyir un proyeutu sociopolíticu qu'ufra una alternativa real al sucursalismu provincianu y capitalista que gobierna Asturies dende hai décades. 

Presencia nos II Alcuentros Populares de Bimenes

La nuestra militancia tamién tuvo presente na otra cita importante d'esti fin de selmana, los Alcuentros Populares de Bimenes entamaos pola plataforma Asturies en Pie. Tuvimos presentes en toles actividaes, como l'homenaxe a les víctimes del Pozu Funeres, los xuegos, el conciertu y tamién tuvimos ellí col puestín d'información y material, onde muncha xente collaboró con nós. Pa finar solliñar que militantes de Darréu participamos dientru del conciertu d'Arma X n'un actu del Comité Solidariu cola Ucrania Antifacista, onde xunto otros compañeros xubimos con una pancarta al escenariu mentantu lleose un manifiestu.

No hay comentarios:

Publicar un comentario