jueves, 11 de septiembre de 2014

Posicionamientu sobre'l procesu d'autodetermín n'Escocia

Esti prósimu 18 de setiembre va tener llugar n'Escocia un referéndum pa escoyer si esti país quier ser o non un Estáu dixebráu del Reinu Xuníu con vistes a qu'esta nación puede declarar la so independencia nel añu 2016. Escocia foi soberana hasta 1707, cuando tuvo qu'amestase al Reinu d'Inglaterra pola fuercia al travíes de l'Acta de Xunión. Anguaño na sociedá escocesa hai muncho puxu soberanista, lo que xeneró unes condiciones afayaices pa qu'Escocia diere un pasu alantre y Londres tuvo que ceder énte la fuercia d'esti pueblu pa exercer el Drechu d'Autodetermín.

Dende Darréu, la Mocedá d'Izquierda Soberanista d'Asturies, saludamos la voluntá del Pueblu Escocés de querer facer esti exerciciu democráticu y puxar pol Drechu d'Autodetermín. Tolos pueblos tienen drechu a escoyer el so futuru en llibertá y de forma democrática y l'autodetermín ye una cuestión cimera nesti sen, polo que defendemos esti drechu pa Escocia y tolos pueblos.

Tamién queremos solliñar el venceyu qu'Asturies tien con Escocia y toles naciones atlántiques, frutu de compartir unos rasgos culturales ya identitarios propios del Arcu Atlánticu y la cultura celta. Entendemos que les relaciones interceltiques son básiques pa desendolcar nes nuestres naciones la nuestra cultura ya identidá atlántica y averar a la nuestra xente.

Per otru llau ye evidente que pa la mocedá que puxa pola soberanía y llibertá de les naciones la construcción hestórica del Reinu Xuníu nun ye un exemplu a siguir, yá qu'esta ye consecuencia de la imposición inglesa sobre otros pueblos. Nun queremos imposiciones ayenes a los pueblos en nengún requexu del mundu y Escocia nun puede ser una esceición si falamos d'esto.

Polo tanto dende Darréu unviamos un saludu a tol Pueblu Escocés y defendemos el drechu d'Escocia a autodeterminase de forma democrática. Tamién entendemos que los nuestros posicionamientos y la realidá política, social y hestórica del Reinu Xuníu y Escocia faen que nos identifiquemos col SI a la independencia d'esta nación.

Pa finar, creemos que ye una cuestión central da-y protagonismu al pueblu na toma de decisiones, pero esto nun se puede llendar a escoyer si una nación se quier constituyir n'Estáu o non. Como organización de clas que somos nun podemos obviar qu'esti procesu en clave independentista tien de dir de la man de la xusticia social y por ello llamamos a la clas trabayadora escocesa a conquistar el so futuru ensín arrenunciar nesti procesu a la emancipación social. Llamamos a fuxir de les estructures de la oligarquía europea ya internacional (UE, OTAN, FMI...) y organizase pa facer d'esta nueva Escocia que puede asoleyar un Estáu al serviciu de les necesidaes de la xente y non del capital.

¡L'ÚNICU CAMÍN YE L'AUTODETERMÍN!
AYE ALBA - YES SCOTLAND - SI ESCOCIA

No hay comentarios:

Publicar un comentario