miércoles, 8 de octubre de 2014

Contra l’Asturies del caciquismu y la corrupción: ye la hora de la soberanía y el socialismu






Según se conocío, l’ex-dirixente del SOMA José Ángel Fernández Villa ta implicáu nun presuntu casu de corrupción y delitu fiscal, como consecuencia d’una “regularización” de millón y mediu d’euros viniente de Suiza, dientro de l’ “amnistía fiscal” desendolcada pol actual gobiernu español.

Dende Darréu nun podemos facer otra cosa qu’allegranos énte una prueba más de dalgo que yera un secretu a voces: la corrupción sistematizada al calor de los Fondos Mineros nel nuesu país, y la rede clientelar texía alredor fundamentalmente de la FSA-PSOE y SOMA-UGT, principalmente nes cuenques mineres, durante les caberes décades.

La mocedá tien muncho de lo qu’acusar a Fernández Villla, como cara visible y representativa del  actual réxime del 78, continuador al so mesmu tiempu del anterior. El desmantelamientu de la industria, o’l desendolcu corruptu y ayenu a los intereses populares d’una “reconversión” qu’enxamás foi tal, ye una de les causes perimportantes de l’ausencia d’oportunidaes llaborales n’Asturies, especialmente pa la mocedá asturiano, y en particular pa la mocedá d’unes cuenques mineres que nun ven otru camín posible que’l de colar.

Sicasí, dende la Mocedá d’Izquierda Soberanista nun vamos señalar namái a un home, a una organización, o a la clas política del réxime dominante n’Asturies, porque entendemos que la corrupción, el despilfarru de fondos mineros, el clientelismu, l’amiguismu, les carencies democrátiques propies de sistemes caciquiles, etc, son daqué estructural nel capitalismu organizáu na nuesa tierra baxo l’Estáu español. Ye, polo tanto, lo inherente y asperable tamién pa les instituciones sucursalistes que’l Reinu d’España remana nel nuesu país, xestionaes por partíos como la FSA-PSOE, PP, IU, o Foro, y por sindicatos como SOMA-UGT, CCOO o USO.

Consideramos que namái la tresformación de la sociedá puede cambiar la situación llaceriosa que viven les cuenques y el restu d’Asturies. Hai qu’algamar poder popular y una Asturies más soberana, onde'l so pueblu tome toles decisiones y nun vengan imposiciones de la Europa del capital o d'España. Ente les cuestiones más urxentes y necesaries nesi sen, la nacionalización d’un carbón que sigue siendo sustentu de bona parte d’Asturies, y que namái podremos facer realidá con soberanía política y económica p'Asturies. 

Pa finar, queremos señalar tamién que toos estos casos de corrupción que vienen surdiendo, afiten claramente la necesidá superar los marcos de les cúpules de los sindicatos institucionales (SOMA y CCOO) y puxar poles Asamblees de Trabayadores y otros marcos de poder obreru que puean conformase.

Valió de fracasaes iniciatives privaes sofitaes nel amiguismu y clientelismu de millonarios fondos públicos; valió de caciquismu políticu y sindical; valió de condergar a la mocedá al paru, la precariedá y la emigración. Ye la hora de la soberanía y el socialismu.

No hay comentarios:

Publicar un comentario