lunes, 13 de octubre de 2014

Darréu solidarízase con Libertat énte l’acosu del Estáu francés





Libertat, organización occitana d’izquierda revolucionaria, denuncia que dende va unos meses y delles vegaes (5 citaciones), militantes de so fueron convocaos pola policia y ún d’ellos sedrá xulgáu’l 17 d’ochobre. Dichu xuiciu ye consecuencia de la violencia policial asocedía en Pau, na Fiesta de la Música del 21 de xunu (fiesta estatal na que la xente puede tocar música pela cai). La policia atacó con violencia los conciertos entamaos pola Tor deu Borrèu, llugar politicu y asociativu de Libertat, nel barriu del Hedas, acabando too ello con condenes de cárcel pa dos persones y pena de prórroga pa otres dos, toes presentes na fiesta.

Pa Libertat too esto nun ye casualidá, y supón una dinámica d’acosu organizáu escontra la so organización y a la gueta de fechos que xustifiquen el zarru d’espacios como Tor deu Borréu, amás del afuegue financieru que supón pa una organización popular tener que facer frente a los gastos de tou esti procesu.

Poro, dende Darréu-Mocedá d’Izquierda Soberanista queremos sumanos a la solidaridá internacionalista pa colos nuesos compañeros y compañeres d’Occitània, contribuyendo no posible a esparder los casos represivos que sufren pola so llucha p’algamar la llibertá y el socialismu.

Como bien sabemos, estos fechos d’acosu, represión, multes, ya incluso cárcel y tortures, vienen asocediendo dende cuantayá  n’estaos como’l francés o l’español, que comparten un fuerte raigañu imperialista y naturaleza opresiva pa coles distintes realidaes nacionales que nellos esisten. Nesi sen, son munchos los casos de multes, xuicios, y otres formes de medrana y represión les que n’Asturies tamién carecen dende les organizaciones combatives.

El meyor arma escontra estos casos, ye la solidaridá internacionalista y de clase. Porque la llucha nun va aparar, nin n’Asturies, nin n’Occitània.

No hay comentarios:

Publicar un comentario