Crónica del Día de la Mocedá Revolucionario 2014

El Día de la Mocedá Revolucionario 2014 entamó esti vienres 17 con delles actividaes nel Llocal Cambalache. En primer llugar, una charra hestórica alrodiu l’ochobre’l 34 a cargu del hestoriador Sergio Alonso Pampliega, que repasó los fechos más rellevantes d’esti movimientu revolucionariu asturianu, asina como’l so contestu y delles anéudotes perinteresantes pa facer alcordanza, una vegada más, de la considerada como la cabera revolución obrera d’Europa, nel so 80 aniversariu.

Depués de la charra, púnxose’l puntu de mira na actualidá de les lluches n’Asturies, con una mesa redonda na que ponentes venceyaos al movimientu de reivindicación llingüística, Darréu, Plataforma Feminista y Corriente Sindical d’Izquierda desplicaron los sos plantegamientos, lluches y esperiencies nes distintes parceles de trabayu que desendolquen dientro la esquierda tresformadora del nuesu país. Pa rematar la xornada, un prestosu pinchéu popular.

El sábadu tornaron les actividaes dende pela mañana, principiando con un Alcuentru Internacionalista cola presencia de Yesca (Castiella), Ernai (Euskal Herria), Isca! (Galiza) y Agora (País Llionés), perinteresante al dar a conocer n’Asturies les sos principales lluches y la situación y problemátiques principales de les sos respeutives naciones.

Darréu tuvo llugar una Xinta Popular con fabes y arroz con llechi, carauterizada pol bon ambiente y la xermandía. Poco depués, rumbu al cimenteriu d’Uviéu pa entamar la ruta pelos sitios clave de la revolución d’ochobre (a cargu de la hestoriadora Amaia Caunedo), que durante unes 3 hores percorrió puntos emblemáticos de los fechos de 1934 nel conceyu uvieín, con final nel Campus d’El Milán.

Pa siguir cola actividá continua d’esti DMR 2014, poco enantes del conciertu Darréu desendolcó un actu simbólicu contra la emigración de la mocedá, cola proyeición de les semeyes unviaes por decenes de persones esixendo futuru n’Asturies o denunciando la so emigración forciada, amás de la llectura d’un testu alrodiu d’esta perimportante problemática que la Mocedá d’Izquierda Soberanista trabaya con una nueva campaña entamada selmanes atrás.

Y posteriormente, el XI Asturies Nun Escaez na Sala Sir Live d’Uviéu, cola participación de potentes grupos de la escena asturiana: el mezigayu ska de La Tarrancha, el punk-folk de Skontra, el ska-punk de Skama La Rede, y el rock astur d’ Ochobre y Avientu. Estos dos caberos grupos, bien venceyaos como dos xeneraciones del rock astur na zona Riosa y alredores, amosaron gran emotividá, al debutar Ochobre con versiones de los veteranos riosanos y un tema propiu d’estrenu.
 

 

Y pa finar, Avientu, tornando a los escenarios coindiciendo col so 20 aniversariu y tres 14 ensin tocar, repasaron los sos temes más emblemáticos, con surprieses bien prestoses como l’apaición de Xune Elipe pa cantar con ellos “Llicenciáu en Barricaes”.

Con ello acabó'l XI Asturies Nun Escaez, nel que tamién hebo tiempu pa un actu políticu nel que, xunto coles delegaciones internacionales y una pancarta col llema "La mocedá asturiana en llucha", una compañera afitó la necesidá de siguir la llucha pola soberanía, el socialismu, y el feminismu. Too ello conformó'l Día de la Mocedá Revolucionario 2014, pal que dende Darréu nun podemos facer otra cosa qu’agradecer a la bayura de xente asistente la so participación nes distintes actividaes, con muncha implicación de la mocedá. Tamién ye de xusticia agradecer a los grupos el so compromisu y enfotu pa llevar alantre l’Asturies Nun Escaez, asina como al Llocal Cambalache pola so collaboración.

Y recordái… ¡la llucha sigue!

PUXA OCHOBRE’L 34

ASTURIES NUN ESCAEZ