Día de la Mocedá Revolucionario 2014: Actividaes

Dende la Mocedá d’Izquierda Soberanista nun podíemos quedar ensin facer reivindicación y alcordanza de la revolución d’ochobre de 1934 nel so 80 aniversariu, polo qu’esti 17 y 18 d’ochobre Darréu entama delles actividaes que componen el Día de la Mocedá Revolucionario 2014, esta vegada n’Uviéu.

El vienres 17 les actividaes tendrán como enclave’l Llocal Cambalache (Cai Martínez Vigil, 30), y entamarán a les 18:00 con una charra sobre la revolución d’ochobre de 1934, a cargu de los hestoriadores Eduardo Abad y Sergio Alonso Pampliega, que repasarán lo acontecío nestos fechos protagonizaos pola clase trabayadora del nuesu país.

A les 19:15 pondremos la güeyada n' actualidá con una Mesa Redonda alrodiu les lluches populares na Asturies d’anguaño. Na mesma va a cuntase cola participación de la Plataforma Feminista d’Asturies; Santi Fano (mayestru, pedagogu ya investigador), pa falar alrodiu la Llingua Asturiana; el sindicalista Paco Iglesias (Corriente Sindical d’Izquierda), y Adrián Calvillo (Darréu), sobre mocedá. Pa finar la xornada, un pinchéu popular a les 21:00.

El sábadu siguirá l’actividá en Cambalache de magar les 12:00 con un Alcuentru Internacionalista, nel que les distintes delegaciones internacionales amosarán les sos problemátiques y lluches. Pa siguir la xornada, una Xinta Popular (fabada y arroz con llechi, preciu 6 euros) que va preceder a una ruta pelos sitios clave de la revolución d’ochobre, dende les 16:00 a cargu d’Amaia Caunedo y con salida nel Cimenteriu d’Uviéu.

A la fin d’esta ruta, haza les 19:00, tendrá llugar frente a la Sala Sir Live un actu escontra la emigración forciada de la mocedá, encuadráu dientro de la campaña que Darréu desendolca contra esta problemática n’Asturies.

Pa rematar la xornada y el DMR 2014, el conciertu XI Asturies Nun Escaez na Sala Sir Live, dende les 20:00 hores con Skama La Rede, Avientu, Ochobre, La Tarrancha y Skontra. Tanto durante’l conciertu como nel restu d’actividaes va llevase alantre’l “DMR Solidariu”, iniciativa cola qu’animamos a traer un kilu de comida non perecedero que va ser destinao a la despensa popular autoxestionada que desendolca l’Asamblea de Para@s y Precari@s d’Asturies.