[Pa la versión en Castellán: blogue de la dinámica internacional]
Les
organizaciones xuveniles de los distintos pueblos oprimíos pol Estáu Español
queremos amosar el nuesu compromisu colectivu a favor de la celebración d'un
Referéndum d'Autodeterminación na Comunidá Autónoma de Catalunya'l próximu 9 de
payares.
Los pegoyos del réxime decadente de
1978, que foi impuestu poles élites polítiques, económiques, relixoses y
sociales del Estáu pa poder siguir esplotando a les clases trabayadores de les
distintes naciones oprimíes que lu formen, amorien agora más que nunca. Esti
réxime, ñacíu va cuatro décades de la
falsa transición política y que sirvió a les clases dirixentes del Estáu
Español pa caltener la so posición de poder dempués de la dictadura fascista
del xeneral Franco, esbarrúmbase agora gracies a les innumberables griesques
que llibremos nes cais dende tolos frentes de llucha.
Tolos
pueblos tienen derechu a l'autodeterminación. Esti drechu ye inalienable y pasa percima de cualquier
sistema constitucional. Una parte de los Països Catalans decidió faer efectivu
esti derechu. Asina se demostró repetidamente en numberoses movilizaciones
masives nes cais y na organización de más de mediu millar de consultes
populares auto-entamaes que forzaron el pasáu mes d'avientu la convocatoria
d'una consulta sobre la independencia'l próximu 9 de payares na Comunidá Autónoma de Catalunya.
Tenemos
que ser conscientes de que nengún procesu de rotura col réxime del 78 va ser
posible ensin desobedecer.
La desobediencia al orde constitucional ye la única vía posible pa consiguir la
nuesa llibertá. Coles mesmes convién aportunar nel fechu de que les nueses
élites polítiques y económiques autonomistes y capitalistes, nin pueden nin
tienen nenguna intención de desobedecer a España pa materializar la
independencia. Por esta razón, resulta indispensable que'l pueblu sía'l centru
de cualquier procesu de lliberación nacional. Porque la rotura col Estáu
español tien de ser un proyectu al serviciu de los pueblos y de los
trabayadores.
Cada
pasu del pueblu catalán a favor de la rotura col réxime tien que tar
decididamente enmarcáu en consiguir la independencia nel conxuntu de los Països
Catalans. Pa ello,
entendemos que ye un deber del independentismu catalán esparder la llume de la
desobediencia en tol territoriu pa responder con determinación a toles
coxuntures qu'asocedan en cada unu de los distintos territorios que conformen
la nación catalana.
Queremos
la independencia pa poder camudalo too. Entendemos el derechu a l'autodeterminación como'l
derechu a decidir sobremanera lo que nos afecta. Les clases trabayadores, el
conxuntu de les clases populares y, a la fin, toles persones víctimes de la
ofensiva capitalista y patriarcal, tenemos que ver na independencia una
ferramienta fundamental que nos dexe superar de forma integral tol orde
establecíu pa sabenos definitivamente llibres. Pa consiguir los nuesos oxetivos, ye fundamental que la mocedá
trabayadora de tolos pueblos oprimíos pol Estáu Español xunamos les nueses
lluches so la bandera del internacionalismu, pa consiguir la nuesa
independencia y acabar col capitalismu y el patriarcáu.
Les organizaciones embaxo firmantes
espresamos de forma clara'l nuesu sofitu a la celebración d'esta consulta y
reivindicamos, una vegada más, el derechu a l'autodeterminación de tolos
pueblos oprimíos pol Estáu Español, lo mesmo que de tolos pueblos oprimíos del
mundu.
¡Mientres
nun nos dexen suañar, vamos ser la so pior velea!
¡Independencia,
socialismu y feminismu!
ARRAN, Ernai, Jaleo!!!, Purna, Yesca,
Briga, Isca!, Darréu, Azarug ya Inekaren.
No hay comentarios:
Publicar un comentario