jueves, 30 de octubre de 2014

Otra vuelta de tuerca demográfica





L’ INE vien d’asoleyar unes proyeiciones demográfiques que, como ye vezu nestos datos p’Asturies, trae les permales noticies asperaes. Según esti trabayu, Asturies va perder 87.968 habitantes en 15 años, asitiándonos polo tanto en 2029 con unos 971.000 habitantes. 

Esta previsión de perda poblacional ye la segunda mayor  del Estáu español, suponiendo una mengua diaria d’alrodiu 16 habitantes, con una baxada del 32% na población menor de 10 años y un espoxigue del 34% na mayor  de 64. En definitiva, menos xente, y más vieyo.

Y too esto, como venimos denunciando dende la Mocedá d’Izquierda Soberanista, ye frutu de la falta futuru dignu nel nuesu país. La mocedá vese condergada a la emigración, y la que queda nel país, nun tien otra perspeutiva no llaboral que’l paru y la emigración. Y con dicha perspeutiva, ye evidente que nun va medrar nin la natalidá, nin la mocedá que vive, estudia y trabaya n’Asturies.

Suponiendo’l 2% de les moces y mozos esistentes nel Estáu español, la mocedá asturiano representa’l 5% de la emigración; la mocedá ensin trabayu anterior, ye un 10% de les persones apuntaes al paru; la xuventú qu’emigra fuera d’Asturies a la gueta trabayu, cúntase por miles cada añu; siguen retayándose beques, siguen medrando les tases, sigue empiorando la calidá educativa… y la rempuesta gubernamental a toes estes cuestiones, ye o bien de papel activu agresor, o de pasividá.

Sicasí, nun asperábemos que fuere d’otra forma; la solución a estes problemátiques nun van venir de les instituciones que representen los intereses de les élites socioeconómiques del Estáu español y les sos sucursales n’Asturies, sinon de la soberanía del pueblu trabayador asturianu, materializada nuna República Socialista Asturiana qu’apurra les ferramientes pa organizar la política, la economía, los planes sociales, etc, atendiendo esclusivamente a los nuesos intereses.

P’algamalo: organización y llucha. Y nello el papel de la mocedá non solo ye fundamental, pol so rol inherente de motor na dinamización y progresu de cualquier sociedá, sinon tamién porque somos los principales perxudicaos pol actual orde afitáu nuna Asturies que, nesti Estáu español capitalista y patriarcal, nun tien nengún tipu de viabilidá, nin puede ofrecer futuru dalu a les clases populares.

QUEREMOS UNA ASTURIES PA VIVIR Y TRABAYAR
FUTURU N’ASTURIES

No hay comentarios:

Publicar un comentario