La mocedá pola absolución de les persones deteníes el 14-P

El próximu vienres la plataforma Asturies en Pie entama una movilización antirrepresiva en  Xixón, col envís d’esixir l’absolución de les persones deteníes na fuelga del 14 de payares, va yá dos años. Decenes d’años de cárcel y miles d’euros de multes, ye’l preciu que tien que pagar el pueblu trabayador asturianu por lluchar consecuentemente y con decisión polos sos drechos, fechu que mos amuesa, por si había dubia dala, a qué clase social obedecen les fuercies policiales y l’Estáu español en sí.

Per desgracia nun son les úniques persones represaliaes pola so llucha, pero faise imprescindible siguir movilizándose por defendeles. La solidaridá de clase ye la nuesa meyor arma pa que la represión nun seya quién a aparanos. Asina, pa una mocedá condergada al paru, la precariedá, y la emigración, nun queda munchu más camín que la llucha pola tresformación social, llucha qu’encarnen perbién estes persones represaliaes.

Ye por ello que dende la Mocedá d’Izquierda Soberanista llamamos a participar nesta movilización con entamu a les 19:30 nel Palaciu de Xusticia de Xixón, porque la xuventú tenemos qu’asitianos non solo como motor de dinamización de la nuesa sociedá, sinon tamién como vanguardia na defensa d’esta máxima: nun hai victoria ensin llucha, y nun hai llucha ensin solidaridá.

DETENÍOS/ES ABSOLUCIÓN

PUXA LA LLUCHA DE LA CLAS OBRERA