Clientelismu, amiguismu, represión... ¡fuera corruptos/es!

Nos últimos díes torna a tar d’actualidá  Esther Diaz, alcaldesa de Llangréu demientres l'añu 2003 y 2012, siendo presidenta de la Mancomunidá del Valle del Nalón demientres 3 años y presidenta del Patronatu del Muséu de la Siderurxa, de la Comisión de la Función Pública y Recursos Humanos de la Federación Española de Municipios y Provincies, y Vicepresidenta y Presidenta en funciones del Patronatu de la Fundación Sanatoriu Adaro. 

Anguaño alcuéntrase nel cargu de Conseyera de Bientar Social y Vivienda, onde torna a tar de rellevancia pola so participación accionarial na empresa del maríu, cola que participaron nuna bayura d’obres realizaes n’Asturies pola Alministración nos caberos años: dende grandes infraestructures como El Musel o’l nuevu HUCA, hasta’l nuevu Ganzábal, el soterramientu de FEVE en Llangréu, o l’autovía Riañu-Sama, espeyando una perimportante participación n’aquella redolada onde Esther Díaz cuntaba y cunta con grandes influyencies y poder.

Dende Darréu venimos señalando dende mui atrás les práutiques mafioses y antidemocrátiques de la FSA-PSOE y los sos brazos sindicales en xeneral, y de les cuenques mineres y el conceyu de Llangréu en particular, onde’l clientelismu, l’amiguismu y’l vasallaxe de cualquier tipu tan a la orde’l día.

A too ello hai que sumar el so perimportante papel represivu demientres caltuvo l’alcaldía, qu’afeutó perespecialmente a la nuesa organización: represión nos Día de la Mocedá Revolucionario entamaos por Darréu nel conceyu (seguimientos policiales, prohibición del X Asturies Nun Escaez…), hasta multes de más de 10.000 euros pola pegada de cartelos y pegadielles, que xuben hasta más de 24.000 xuntando les multes a otres organizaciones como’l PCPE.

Asina, vemos una vegada más cómo otru paradigma del furrulamientu mafiosu enzabezáu n’Asturies pola FSA-PSOE y SOMA-UGT, y sofitáu pol restu d’opciones polítiques y sindicales institucionales, entama la so cayida en desgracia, al dir descubriéndose dalgunos de los múltipes trafullos desendolcaos en toos estos años.

Poro, dende la mocedá paeznos de xusticia desixir que los responsables de toes estes práutiques paguen pol so facer a costa y a espaldes del pueblu, ensin escaecer con ello que la corrupción, el clientelismu, l’amiguismu, etc son inherentes al sistema capitalista -sustentáu nel nuesu marcu pol Estáu español y les sos instituciones sucursalistes n’Asturies-, y nun cunten nelli con solución posible.