Día de la llingua materna: ensin oficialidá nun hai democracia

Esti sábadu 21 de febreru ye'l Día Internacional de la Llingua Materna, una bona fecha pa siguir señalando la situación antidemocrática carecía poles llingües propies d’Asturies y les sos comunidaes de falantes, como amuesa’l silenciu institucional pa con un día bien simbólicu como ésti. Les nueses llingües maternes, asturianu y eonaviego, siguen ensin vese llegalmente reconocíes n’igualdá de condiciones col castellán, esto ye: ensin oficialidá, situación qu’espeya la situación predemocrática na qu’entá s’alcuentra’l nuesu país.

Dende la Mocedá d'Izquierda Soberanista esiximos dos coses nel Día Internacional de la Llingua Materna: la declaración d'oficialidá y un procesu de normalización llingüística n'Asturies, decidíu, ensin complexos nin prexuicios, y col enfotu poder vivir plenamente nes nueses llingües y, en consecuencia, consiguir el so caltenimientu. Estes son les nueses vindicaciones pa esti día, el cumplimientu d’unos mínimos democráticos qu’enxamás se dieron nesta Asturies somorguiada dafechu al Estáu español.

Pa Darréu ye clave que la mocedá del país esconsone y reclame con fuercia los sos drechos llingüísticos, ya que ye esta parte de la población la que ta llamada a ser dinamizadora y motor de cambiu nesta sociedá, d’otra manera mayoritariamente avieyada ya inmóvil. Les nueves xeneraciones tenemos qu'algamar una Asturies más llibre, xusta y digna y pa qu'eso seya posible tenemos que superar el conflictu llingüísticu, pa lo que cabe esixir a toles fuercies polítiques, movimientos sociales, y coleutivos de toa triba, unos mínimos democráticos que pasen por delles cuestiones, y ente elles, el tema que nesta ocasión nos ocupa: la oficialidá y normalización de les nueses llingües propies. Ensin eufemismos, ensin oportunismos eleutorales, ensin mieu. 

Pa finar, dende la Mocedá d’Izquierda Soberanista nun queremos escaecer a los partíos con representación na Xunta Xeneral como responsables y cómplices de la situación que viven les nueses llingües, y ye que nes sos manes taría poner solución a una situación que, ta visto, necesita de tol puxu y organización popular p’algamar una igua. Tampoco vamos escaecer a les nueves fuercies con clares opciones d’entrar nesi parllamentu, y a les que nun cabe más que desixi-yos lo mesmo: un posicionamientu claru y esplícitu pola oficialidá.

Sicasí, consideramos que’l xuegu eleutoral y parllamentariu ye namái un elementu de los munchos a la hora de facer política, polo que’l nuesu papel ye’l de siguir trabayando dende abaxo, na cai, pola oficialidá y la normalización hasta algamala, pero tamién trabayando pol espardimientu de les nueses llingües na mocedá, y por tar sollertes y denunciar toa práutica d’agresión, posibilismu, menospreciu, etc, haza l’ asturianu y l’eonaviego.