8 marzu: en llucha por una Asturies antipatriarcal

Un añu más llega’l Día Internacional de la Muyer Trabayadora, una fecha que pesie a la so institucionalización, caltién un perimportante conteníu pa la reivindicación, y pa completar un día más de los 365 que cada añu debemos dedicar a la llucha escontra’l patriarcáu.

Un patriarcáu que n’Asturies afítase de forma bien acusada col sistema capitalista –pa cuya supervivencia ye imprescindible esti sistema d’opresión a les muyeres- y les estructures coles que s’executa la opresión al pueblu trabayador asturianu, tales como l’Estáu español, la Xunión Europea, FMI, etc.

Poro, les muyeres asturianes alcontrámonos con una triple opresión: la nacional, la de clase, y la de xéneru, coles sos espeficidaes y matices concretos, pero que nun s’entienden nel contestu d'anguaño la una ensin la otra. Y les cifres sofiten estes afirmaciones, con unos niveles de paru, precariedá, brecha salarial, etc, n’espoxigue de forma más acusada pa les muyeres pol fechu de selo, amás de problemátiques como la violencia machista, la cosificación de les muyeres, etc

Tamién nos paez imprescindible siguir avanzando non sólo na creación y treslladu a la sociedá d’estos mensaxes feministes y antipatriarcales dende la perspeutiva soberanista y de clase, sinon tamién predicar col exemplu, continuando’l trabayu pa frayar dafechu con toa seña contraria a estos principios que se puea dar nel entornu militante d’Asturies. 

Pa finar, dende Darréu reivindicamos el drechu a decidir de les muyeres: valió de midíes –o intentos de midíes- regresives pa colos drechos de les muyeres, valió de discriminación patronal, valió de roles sociales tresnochaos y nocivos. Pa ello, consideramos imprescindible’l camín de la soberanía, entendíu como un procesu de rotura total col sistema nos trés exes principales d’opresión que sufren les muyeres asturianes:

-Frayar col capitalismu pa la nuesa dignidá, bientar, y desendolcu como clase. P'acabar col modelu de sociedá burguesa.

-Frayar col patriarcáu pa poner fin a les opresiones y dominaciones sufríes específicamente poles muyeres. 

-Frayar col Estáu español y la Xunión Europea como estructures de les élites capitalistes que son, baxo les que nun ye posible una Asturies soberana.

TRIPLEMENTE OPRIMÍES, TRIPLEMENTE EN LLUCHA

PUXA LA LLUCHA DE LES MUYERES

ASTURIES FEMINISTA