domingo, 15 de marzo de 2015

Desendolcada la Xornada feminista nel Llar La Llegra





Acaba una fin de selmana perimportante pa la izquierda soberanista asturiana, la selmana de la inauguración d’un nuevu espaciu físicu xunitariu n’Uviéu. Y dende Darréu tuviemos el privilexu d’estrenar el llar tres la so inauguración el vienres, cola xornada feminista que desendolcamos durante tol sábadu.

L’actividá entamó de magar les 12:00 cola decoración con motivos feministes del espaciu, asina como la preparación de futures iniciatives a esti respectu. Haza les 16:30 desendolcóse l’actividá “Deprendiendo xuntes”, onde dos profesores ficieron un completu repasu tanto de los fechos y formulaciones más importantes na hestoria del movimientu feminista, como de la realidá de les muyeres anguaño, con especial enfotu na visión del tarrén llaboral.

Pasaes les 18:30 foi turnu pa deprender de la esperiencia, cola proyeición del curtiu “A golpe de tacón”, alrodiu la llucha de les muyeres na fuelgona del 62, y el posterior testimoniu d’una de les figures más destacaes d’esa y munches otres lluches, anteriores y posteriores, Anita Sirgo, qu’amás d’un prestosu y emocionante rellatu de les sos esperiencies, finó con un mensaxe col que mos quedamos dende la Mocedá d’Izquierda Soberanista:  ye imprescindible la llucha, y ye imprescindible nun aparar hasta algamar aquello polo que se desendolca esa llucha.

Poro, remató asina una prestosa xornada cola qu’asperamos contribuyir a siguir un camín entamáu na direición d’afondar na cuestión feminista na nuesa organización en particular y na izquierda soberanista en xeneral, a comuña, formándonos, deprendiendo, aldericando, y avanzando nel camín de frayar col patriarcáu y toa otra forma d’opresión. 

PUXA ASTURIES FEMINISTA






No hay comentarios:

Publicar un comentario