La mocedá siguimos denunciando'l desmantelamientu de les cuenques mineres

Falar d´Asturies ye falar de precariedá y de moceda ensin futuru al mesmu tiempu, anque esta situación nun ye nada nuevo. Col pasu del tiempu lloñe de meyorar, va cada vegada a pior, y anque ye una situación qu’ afecta al conxuntu d´Asturies, quiciabes l’epicentru s’atopa nes cuences mineres.

En rellación a esti tema, según datos publicaos fae bien pocu pola delegación sindical de CCOO nel nalón, solamente nel añu 2014 baxó la población en 1126 persones, y si lo comparamos cola población del 2007 la cifra aumenta hasta un total de 5675 vecinos qu'apurren una parte considerable al total de perda de población d’ Asturies, cifráu nunes 13.106 persones dende'l añu 2007. Estos datos van xunios a los del aumentu del paru na cuenca del Nalón, que medró un 82 % dende el inicu de la crisis capitalista nel Estáu español.

Esti problema ta provocáu por milenta causes, pero una de les mas importantes ye’l brutal desmantelamientu que sufrió la cuenca minera asturiana dende l’iniciu de les primeres reconversiones industriales, y el progresivu zarru de les esplotaciones mineres tantu d'esta comarca como de la cuenca en xeneral. 

La reconversión nun significó solamente'l zarru de les esplotaciones y la perda de munchos puestos de trabayu, tantu directos como indirectos, sinon que s'agravó pola nula xestión de los fondos mineros creaos en teoría pa evitar qu'estes zones se convertieran en desiertos industriales, pero lloñe d´ invertise en desaniciar esta situación la mayoría de les vegaes acabaron nos bolsos de personaxes como Villa y la mafia sindical dominante na cuenca, qu'en cuenta de lluchar polxs trabayadorxs y pol futuru de la cuenca y d’Asturies, taben más preocupaos na mayoría de los casos de garrar perres pa enllenar bien los sos bolsos, o pa servir los intereses de les élites económiques con proyectos innecesarios o mal plantegaos, que nun xeneren nenguna riqueza pal pueblu trabayador. 

El resultáu d'esta situación nun ye otru que la perda constante de población de la cuenca y d´ Asturies en xeneral,unes tases de paru que tán ente les mas altes de tol estáu y una mocedá que nun tien otra opción qu'emigrar pa guetar trabayu.

Por eso dende Darréu la mocedá combativo seguimos lluchando por una Asturies socialista, feminista y soberana, una Asturies con futuru na que poder vivir y trabayar con dignidá.