Xornaes Feministes nel Llar La Llegra

Dende Darréu entamamos una xornada dedicada al feminismu y la llucha de les muyeres, que va tener llugar el 14 de marzu nel Llar La Llegra d’Uviéu (Cai Postigo Baxu). 

Dende les 12:00 va a desarrollase una decoración con motivos feministes nesti nuevu espaciu autoxestionáu, que tien el firme enfotu de nun dar cabida a nenguna seña de machismu. Y esti sedrá un pasín más nesi oxetivu.

A les 16:30 entamará una actividá formativa na que delles espertes na cuestión van falar alrodiu los oríxenes ya hestoria del feminismu, asina como de la situación llaboral de la muyer. Pa completar la esperiencia, va cuntase tamién cola presencia d’una activista que dará la so visión de l’actualidá del movimientu n’Asturies.

Y a partir de les 18:30 hores, sedrá turnu de deprender de la esperiencia nel nuesu país: va proyeutase’l curtiu “A golpe de tacón”, dedicáu a la llucha de les muyeres na fuelga minera del 62, pa posteriormente cuntar con un testimoniu de luxu: el d’Anita Sirgo, una de les participantes nesa perimportante llucha de les muyeres asturianes.

Con ello dende Darréu queremos contribuyir a siguir deprendiendo y construyendo alrodiu d’una temática tan importante, asina como espardiendo la concencia de que la llucha pola igualdá de xéneru, pol fin del patriarcáu, ye daqué imprescindible ya irrenunciable si queremos construyir una Asturies verdaderamente llibre ya igualitaria.