La Mocedá d’Izquierda
Soberanista ta acabante d’espublizar el so posicionamientu respeuto a les
eleiciones autonómiques y conceyiles del 24 de mayu. Nel mesmu, afítase
en primer llugar un repasu bien críticu pa cola situación que vive la mocedá
asturiano, y la clase trabayadora asturiana nel so conxuntu: paru, precariedá,
emigración, represión, caciquismu… son elementos de la so realidá diaria,
señalándose’l sistema capitalista y la falta de soberanía d’Asturies como
principales responsables, y a formaciones polítiques como FSA-PSOE, PP, IU o
Foro, como dalgunos de los sos executores y xestores.
Pa Darréu anguaño la
llucha principal ta na cai. Sicasí, plantegamos puntos que mos paecen mínimos
ya imprescindibles p’analizar cualquier candidatura: la llucha por un procesu
constituyente asturianu, qu’amás de poner en valor Asturies como suxetu
políticu soberanu, tenga en cuenta cuestiones como la defensa d’una educación
pública, llaica, igualitaria y apegada a la realidá social, hestórica, cultural
o llingüística d’Asturies; polítiques d’empléu pa la mocedá, garantía
d’aplicación del drechu a la vivienda y prohibición de los desagospios; entamu
d’un procesu de reindustrialización y reactivación de los seutores económicos
tradicionales; nacionalización de la banca y los seutores productivos (siendo
claves enforma nel casu asturianu dellos como l’enerxéticu, mineru,
siderúrxicu, naval…); polítiques ambicioses n’igualdá de xéneru; afondamientu
na democratización del país y la participación popular aprovechando
ferramientes tradicionales como’l Conceyu Abiertu; algame máximu de
competencies polítiques y económiques; reconocimientu d’Asturies como
nacionalidá hestórica, supresión de la institución del “Principado”, oficialidá
pa les nueses llingües propies (col so correspondiente procesu de
normalización, escolarización n’asturianu y gallego-asturiano, reimpulsu y acabu del procesu
toponímicu, RTPA n’ast…) y polítiques culturales de puxu decidíu polo propio
(tanto tradicional como nueves creaciones); amnistía pa toles persones
condergaes o encausaes por lluches polítiques y sociales…
En cuantes a la
Izquierda Soberanista, analízase críticamente a la única candidatura nestes
eleiciones, Andecha Astur, poles sos práutiques al marxe de les dinámiques
xunitaries, y la so presencia incondicional en cualquier procesu eleutoral
ensin un analís previu de “por qué” y “pa qué”. Ye por ello polo que nun se
llama al votu pa nenguna candidatura nestes eleiciones autonómiques.
Nel tarrén
conceyil, señálase como exemplu y referencia a Conceyu Abiertu por Noreña,
teniéndose en cuenta tamién candidatures amplies como Pueblu, y otres
propuestes como Compromisu por L.lena.
En tou casu, pa
Darréu la prioridá ye enanchar el trabayu de base, y siguir col procesu de
rearticulación de la Izquierda Soberanista que tien que desembocar la
construcción d’un referente sociopolíticu que complemente y dea nuevos cauces d’actuación
al trabayu que se vien faciendo en frentes como l’estudiantil, xuvenil, social,
sindical, etc.
No hay comentarios:
Publicar un comentario