Charra: “Raigaños celtes d’Asturies” nel Llar La Llegra

El vienres 29 de mayu la organización xuvenil Darréu entama nel Llar La Llegra (Cai El Postigu Baxu, 40 – Uviéu) de magar les 19:00 hores la charra “Raigaños celtes d’Asturies”.

Sedrá esta una bona oportunidá pa deprender o afondar no rellacionao colos elementos de raigañu celta de la cultura asturiana, asina como les razones poles que se considera y reivindica a Asturies como una de les naciones celtes esistentes anguaño, amosándose, ente otros puntos, por qué’l celtismu ye ún de los noyos de la identidá asturiana, asina como la importancia de la cuestión nel nuesu país.

Pa ello va cuntase como ponente con Inaciu Llope, qu’amás d’hestóricu militante del nacionalismu asturianu, mélicu, poeta o ensayista en llingua asturiana, ye espertu nesta cuestión, como bien amuesen los sos trabayos espublizaos al respeuto. 

Dende Darréu encamentamos a la mocedá a afondar na conocencia de la nuesa cultura y los nuesos raigaños, col envís de defendela énte l'aculturización empobinada poles élites polítiques y económiques que remanen les estructures de poder que mos somorguien.