Vienen d’asoleyase
los datos del paru nel mes de mayu, y la mocedá asturiano nun tien un res de lo
que felicitase. Énte l’autobombu gubernamental por una supuesta “ameyora
estructural” nel desemplegu nel conxuntu del Estáu español, vemos una Asturies
na que les mengües del paru nun son más que maquillaxe provocáu pola emigración
de población, principalmente mocedá, y por una situación pa la xente en
desemplegu na que cada vegada reciben menos prestaciones (yá namái’l 51% cunta
con dalguna, y baxando).
Y no tocante
n’esclusiva a la propia mocedá, los datos nin siquier apaecen maquillaos, sinon
en tola so crudeza: un desemplegu siempres averáu al 50% nos menores de 25
años, y un coleutivu da paraos/es ensin trabayu anterior que medra en más de
mediu centenar de persones nel últimu añu, asitiándose en casi 9.000 de les que
la gran mayoría alcuéntrense nuna edá inferior a los 30 años. A ello sumamos la
yá citada emigración, estimada nuna media d’aprosimadamente 40 persones al día,
más de 16.000 al añu.
A too ello podemos
amestar que de los 25.275 nuevos contratos firmaos en mayu, más de 23.000 son
de calter temporal, carauterizándose polo xeneral por un perfil bien precariu
que va n’espoxigue, too ello pesie a la perbaxa tasa d’actividá y de población
activo cola que cuntamos n’Asturies.
Son dalgunos datos
que namái afiten la situación qu’ufre Asturies a la mocedá dende va cuantayá:
paru, precariedá, y emigración. Poro, dende Darréu señalamos que la propaganda
gubernamental non solo ye falsa, sinon que sigue tapeciendo cuestiones bien
básiques como’l desendolcu de planes d’emplegu xuvenil y otres munches midides
que podríen tar en marcha pa facer d’esta problemática daqué menos grave.
Sicasí, dende la
Mocedá d’Izquierda Soberanista tamién insistimos en que cola pura reforma namái
vamos poder poner parches a la situación, y namái cola organización y llucha
pola tresformación social y l’avance haza la soberanía política y económica
p’Asturies vamos ser quién a valtiar dafechu esti grave panorama pa la mocedá
asturiano.
No hay comentarios:
Publicar un comentario