miércoles, 1 de julio de 2015

La mocedá en pie escontra la Llei Mordaza



Esti 30 de xunu'l Pueblu Trabayador Asturianu salió a les cais pa refugar esta nueva llei represiva, dientro de la xornada de llucha entamada por Asturies en Pie ( CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA).



Na mesma diéronse llugar numberoses aiciones, dende delles barricaes en llugares como Xixón o Llugones, a la presencia masiva de pancartes esixendo la retirada de la Llei Mordaza, aiciones informatives, y tamién propagandístiques, siendo la manifestación de pela tarde en Xixón la culminación de toles actividaes reivindicatives, informatives y de denuncia.



Miles de persones axuntáronse glayando escontra la represión, pola llibertá de los 5 de Zarréu, y poniendo enfotu una vegada más na necesidá de siguir respondiendo na cai escontra cualquier agresión que dende les instituciones capitalistes del Estáu español quieran imponer al Pueblu Trabayador Asturianu, y a una mocedá especialmente afeutada por esti sistema que non solo mos niega'l futuru n'Asturies, sinon que tamién quier poner un bozal a la mocedá que resiste nel país.



Esta llei atenta escontra tou tipu de manifestación, concentración, reunión y, en definitiva, llibertá d'espresión, yá qu'hasta la crítica nes redes sociales va ser considerao delitu por desobediencia. Esta llei retrógrada quíta-y la careta al llobu, dexando n'evidencia l'autoritarismu y calter opresivu del gobiernu del Estáu Español, nel que primen los intereses de les élites económiques perriba de los de la clas obrera de los pueblos oprimíos, al quita-y a esta un de los pocos drechos que-y quedaben: el drechu a espresase. 



Ye por ello que dende Darréu animamos a la mocedá a siguir amosando que nun mos conformamos colo qu'esti sistema nos ufre, col prietu futuru que mos supón tar somorguiaos al capital, al Estáu español, y al patriarcáu.


No hay comentarios:

Publicar un comentario