Tres consumase na
Xunta Xeneral la investidura de Javier Fernández como presidente del
“Principado” durante la llexislatura qu’entama, gracies al apoyu d’Izquierda
Xunida, dende Darréu queremos treslladar la viniente valoración:
Consideramos
qu’esti pautu nun fae más qu’afitar el continuismu nes estratexes d’IX como
muleta de la FSA-PSOE na Xunta Xeneral, xustificándolo principalmente con
consignes abstractes como “parar a la derecha”. Sicasí, les privatizaciones
sanitaries, el caltenimientu de conciertos económicos con colexos privaos, el
retayu de personal na escuela pública, l’ERA y otres alministraciones y
servicios públicos, la represión sistemática de los drechos de falantes
d’asturianu y gallego-asturiano, la collaboración necesaria en favor de los
intereses privaos d’empreses mineres, de tresportes, construcción, enerxía etc
frente a los intereses del pueblu, miles de persones asperando pol salariu
social, la mitá de les paraes y paraos ensin percibir prestación dala, o la complicidá pa col desmantelamientu
industrial que vien careciendo Asturies, son dalgunos fechos que dexen a les
clares que la FSA nun ye “izquierda”, nin atiende polo tanto a los intereses
del pueblu asturianu.
En cuantu al propiu
alcuerdu d’investidura, amás de probe nes midíes sociales, supón la continuidá
de les polítiques d’aculturización tanto llingüística como nel restu
d’aspeutos, carauterizándose’l pautu polo xeneral por vaguedaes y propósitos
inconcretos en munchos casos práuticamente imposibles de “fiscalizar”, más
tovía cuando la esperiencia diz que la FSA enxamás cumplió íntegros los pautos
con IX, cuestión que nun evitó la repetición de los mesmos una y otra vegada. A
too ello habría qu’amestar l’arrenuncia por completu a procesos que deberíen
ser de mínimos pa quien se diga “izquierda asturiana”, como la reforma d’un
estatutu d’autonomía dafechu obsoletu ya insuficiente.
Pa la Mocedá
d’Izquierda Soberanista, ye especialmente sangrín que la xuventú asturiano
namái merezca nel alcuerdu malapenes un par de llinies, nes que s’afita la
necesidá de “reforzar los planes d’empléu”. Con 40 mozos y moces emigrando a
diariu d’Asturies, paru xuvenil averáu al 50%. 9.000 paraes/os ensin trabayu
anterior, un 90% de temporalidá nos nuevos contratos firmaos, unos sueldos de miseria, y cada vegada
mayores dificultaes pa costease la formación, paeznos que la situación de la
mocedá asturiano debería ser ún de los exes principales de cualquier pautu con
un enfotu real de ser útil pa la clase trabayadora.
Poro, nun podemos
más que refugar el propiu pautu y el so conteníu, considerando qu’apuntalar una
vegada más el réxime que lleva desmantelando Asturies décades nun va servir más
que pa dar continuidá a la situación de la mocedá asturiano y del conxuntu de
la clase trabayadora del nuesu país.
No hay comentarios:
Publicar un comentario