Dende ASTURIES EN PIE, MIERES EN LLUCHA Y DARRÉU queremos convidavos
a participar nel actu de la campaña antirrepresiva ENSIN MORDACES que
cuntará con Banda Bassotti como puntu fuerte del mesmu y que tendrá
llugar en Mieres del Camín el Vienres 30 d´Ochobre.
L’oxetivu
d’esta iniciativa nun ye otra que siguir atropando los fondos necesarios
pa facer frente de forma organizada y coleutiva a los distintos
procesos represivos que sufre la clase trabayadora asturiana:
les peticiones de cárcel por participar nun piquete informativu na
fuelga del 14 payares, o les condergues non en firme a un total de doce
años y mediu de prisión pa los cinco de Zarréu, son dalgunos d’ellos,
pero nin muncho menos los únicos nin casos aisllaos. Les peticiones de
cárcel n’Asturies sumen decenes d’años, les multes por lluches medren, y
la nueva Llei Mordaza supón un pasu más nesa escalada represiva.
Ye por ello esti conciertu una iniciativa más nesa necesaria
autoorganización popular escontra la represión, tando yá confirmáu un
grupu de talla internacional como Banda Bassotti. Los italianos,
sobradamente conocíos na música combativa y comprometía, van tar
acompañaos tamién d’otros conxuntos musicales, que dirán confirmándose a
lo llargo les próximes selmanes, asina como’l restu de detalles d’esta
iniciativa, cuyos beneficios van dir destinaos al pagu de multes, gastos
xudiciales, etc, derivaos de les lluches n’Asturies.
No hay comentarios:
Publicar un comentario