Dende Darréu
queremos espeyar el nuesu refugu pa col facer del ayuntamientu ribeseyanu respeuto
a la colocación de puestos de materiales n’eventos, siendo un exemplu la
esclusividá que-y apurrieron a “Mercazoco Market” nes Piragües. Anque consideremos
prestosa la implantación d’esti novedosu mercáu, nun entendemos por qué nun ye
compatible cola venta de materiales d’un puestu de mocedá o, lo que ye más
grave, cola la venta de materiales por parte d’un colectivu ampliu
d’inmigrantes, siendo esti el so sustentu principal.
Entendemos qu’esta
iniciativa nun fae más qu’amosar una actitú censuradora en rellación a estes fiestes,
que ye una constante nesti conceyu. Dende va años, dende’l consistoriu
ribeseyanu faise por amedranar la pluralidá nes fiestes, siendo Les Piragües el meyor exemplu d'ello. Estos son fechos que se ven cola xunificación del repertoriu músical y coles
desapaiciones de barres alternatives y que demuéstrase anguañu colos actos que
tamos denunciando. El modelu pol qu’apuesta la casa conceyu ye’l de control
absolutu de les actividades que nesti eventu se desarrollen, censurando tou
aquello que nun-yos preste y nun vaiga cola so manera de pensar.
Amás nun ye la
primera vegada que nesti mismu conceyu torguen la colocación de puestos de
mocedá, ya que nel caberu “Ribeseya Rock” refugósenos la posibilidá de vender
los nuesos materiales. Creemos que ñegar a una organización de xente moza
organizada la so principal actividá pa financiase ye debío a unes polítiques
totalmente reaccionaries pa cola xuventú. Nun se boicotea namái esta vía de
autofinanciación de les moces y mozos, sinon que faenlo de manera intencionada
pa invisibilizar la so llabor social reivindicativa.
No hay comentarios:
Publicar un comentario