Un añu más Ochobre
ye tiempu de reivindicación y d’alcordanza, y con ello llega un nuevu Día de la
Mocedá Revolucionario. Esti añu’l formatu amplíase de forma que durante tol mes
d’ochobre podréis atopar diverses actividaes, pero eso nun quita pa que’l platu
fuerte vaya llegar a Uviéu los díes 9 y 10 d’ochobre.
Amás d’actividaes
de calter internacionalista coles delegaciones desplazaes –¡más info
próximamente!-, el vienres na PLAZA LA ESCANDALERA d’Uviéu va desendolcase una Nueche
en danza col grupu folk Caldo y Os Rabizos, amás de los grupos de baille Xeitu
y Fitoria, y micru llibre depués. L’envís nun ye otru que combinar ociu
alternativu, cola recuperación de formes culturales tradicionales del nuesu
país, carauterizaes por un calter comuñal bien útil pa siguir faciendo pueblu
na Asturies d’anguaño.
El sábadu sedrá
turnu pela mañana pa los xuegos tradicionales y una fabadona popular cola que
siguir texendo llazos y espardiendo la reivindicación de la nuesa cultura como
elementu tresformador. A les 19:00 sedrá turnu pa la reivindicación más pura,
con un pasucais pol futuru de la mocedá y escontra la emigración forciada del
que diremos apurriendo más detalles, ¡Queremos futuru n’Asturies!
La fin de selmana
rematará con un XII Asturies Nun Escaez qu’esti añu tien entrada gratuita, y va
axuntar nel escenariu a cuatro grupos con muncha trayeutoria. Skontra, Brutus
Daughters, Adizión Etilika y K-Nalón van traer ritmos punk-folk, hardcore y rap
a la nueche uvieína, nun conciertu que nun podéis perdévos.
Tái sollertes, que
con esto nun acaben les actividaes nin la información sobre elles.
PUXA
OCHOBRE’L 34
PUXA
ASTURIES LLIBRE Y SOCIALISTA
No hay comentarios:
Publicar un comentario