Guardia Real n’Asturies NON ¡República Asturiana!

  

La Guardia Real tien previsto facer presencia n’Asturies nesti mes de setiembre, tando previstes delles actividaes propagandístiques que llegaben a incluyir coses finalmente suspendíes, como desfiles ya incluso adoctrinamientu nes escueles. Son dellos los conceyos afectaos, siendo al nuesu paecer especialmente sangrín el casu de Mieres, conceyu gobernáu por IU como fuercia principal y qu’entá nun se pronunció públicamente escontra esti cuerpu monárquicu.

Dende la Mocedá d’Izquierda Soberanista paeznos inalmisible esta visita, que va escontra la dignidá tanto pasada como presente de la clase obrera asturiana. Pasada, pola tradición de llucha republicana y antifacista d’esti conceyu, silenciada y maltratada dende les instituciones públiques. Y presente, porque se trata d’un cuerpu al serviciu d’una institución antidemocrática y que representa los valores más reaccionarios del Estáu español.

Nós apostamos por siguir puxando nes cais dende la unidá antimonárquica, pero con un discursu bien claru y un proyeutu nacional nidiu: la República Socialista Asturiana. Dende’l respetu y l’alcordanza a los y les cayíes na llucha antifacista en defensa de la II República Española, y mirando al futuru col enfotu d’algamar un proyeutu de país que mos llibere de tou tipu d’opresiones, incluyía la nacional. Y pa ello ye absolutamente imprescindible la soberanía pal nuesu pueblu trabayador.

Facemos polo tanto un llamáu a la mocedá a participar na concentración de refugu a la Guardia Real, que tendrá llugar esti domingu 13 de setiembre a les 12:30 hores na Plaza Xovellanos, asina como na concentración convocada por Asturies en Pie y CSI n’Avilés el miércoles 16 a les 18:00 en Les Meanes, pa glayar que n’Asturies nun queremos monarquía, nun queremos esi “Principado” impuestu, nin los sos instrumentos propagandísticos como los Premios Príncipe. Dicimos SÍ a un futuru con democracia, dignidá y llibertá pa la clase obrera asturiana.

PUXA ASTURIES REPUBLICANA