CONCENTRACIÓN ESCONTRA LA VISITA DE LA GUARDIA REAL A MIERES
DOMINGU 13 DE SETIEMBRE. 12:30 h. PARQUE XOVELLANOS. MIERES ASTURIES
CONVOCA: PLATAFORMA CONTRA LA VISITA DE LA GUARDIA REAL A MIERES
(Mieres en Llucha, PCPE, Asturies de pies, CSI, Alternativa Socialista,
Somos Mieres, FAMYR, Darréu)
Dellos coleutivos políticos y
sociales, asina comu persones a entítulu particular, roblamos el
presente comunicáu escontra la visita y desfile de la Guardia Real en
Mieres. Creemos que la hestoria republicana de Mieres encaxa mal cola
exhibición ecuestre d'un cuerpu militar amestáu a una institución tan
pocu democrática como la monarquía. Los valores de llibertá y democracia
vense socavados cuando s'empondera la institución monárquica, una
institución que nos últimos tiempos namá foi noticia pola so poca
exemplaridá pública, y que la so mera esistencia topeta frontalmente
cola racionalidá y los valores democráticos que tien d'inspirar una
sociedá moderna. Mieres cunta con una perllarga tradición republicana ya
inda güei esisten fueses onde descansen víctimes republicanes del
franquismu del que la monarquía ye heredera.
Asina mesmu,
llámanos poderosamente l'atención qu'un equipu de gobiernu que se diz
republicanu como’l testeráu por Aníbal Vázquez sofite y promueva
viviegamente la presencia de militares monarquicos en Mieres. L'equipu
gobiernu d’Aníbal Vázquez paez xugar con una moneda de dos cares, pero
nun tamos dispuestos a participar nesti xuegu: Aníbal Vázquez tendrá de
decidir ente respetar la memoria republicana de Mieres o bien aplaudir
el pasu de los entorchaos y fusiles monárquicos. Mientres n'Uviéu la
postura d'Izquierda Xunida foi d'oposición a esti actu, Izquierda Xunida
en Mieres abraza a la Guardia Real y a lo que representa. La
realización del desfile militar de la guardia personal del Rei nun puede
considerase de nenguna manera una actividá lúdica o turística, sinón
que supón un ensalzamientu inverosímil de militarismu, cuantimás ante
les neñes y neños de Mieres. La monarquía y un exércitu al serviciu del
Rei nun son los valores que queremos tresmitir a les futures
xeneraciones.
Finalmente, consideramos intolerable'l
comportamientu del equipu gobiernu na xestión llevada a cabu pa traer a
la Guardia Real, una xestión absolutamente opaca y reservada. ¿qué ye,
que sienten los responsables del gobiernu local daqué de vergüenza ante
la traición que tán realizando escontra la tradición y los valores
republicanos de Mieres? Nun podemos almitir qu'un gobiernu que s'enllenó
la boca con discursos de tresparencia mientres la campaña electoral
allegue agora a negociaciones en reservaos y llamaes telefóniques pa
traer a la guardia personal del Rei al nuesu conceyu. Entenderíemos esti
comportamientu n'otres fuerces polítiques, pero nun lo esperábemos de
quien faen alarde de democracia y tresparencia. Nesti sen, entendemos
que se ta furtiando a la ciudadanía un alderique fundamental, y
gustaríanos que se celebrara un Plenu estraordinariu nel conceyu de
Mieres pa que les estremaes fuerces polítiques s’asitiáren sobre esti
asuntu. Consideramos que la trescendencia del mesmu merezlo y, nel casu
de qu’Aníbal Vázquez nun consienta nello vamos entender que va siguir
ensin escuchar a la ciudadanía de Mieres y ensin respetar la honesta
hestoria republicana d'esti conceyu.
Tamién nos gustaría
tresmitir estes entrugues a l'actual Corporacion de gobiernu esperando
una respuesta qu'hasta agora nos foi refugada magar de solicitales pol
rexistru.
Dada la hestoria d'esti conceyu, ¿Cuál ye'l motivu de traer esti espectáculu?
¿Cuál va ser el programa? ¿A qué se debe esta opacidá per parte la corporación?
Teniendo en cuenta'l calter de los partíos que componen esta Corporación, ¿va tar representada oficialmente nos actos?
¿Qué repercusión económica van traer estos actos al conceyu Mieres?
Hai rumores de visites a colexos, ¿cuál ye l'oxetivu pedagóxicu?
Y a lo último, ¿cómo ye posible qu'una Corporación que participa nos
homenaxes nel Pozu Fortuna traiga a la guardia real a Mieres?
No hay comentarios:
Publicar un comentario