Esti domingu 20
d’avientu les asturianes y asturianos tornen a tar llamaes/os a votar, nesti
casu pa les Cortes del Estáu español. Dende Darréu, como organización política
xuvenil, nun podíemos quedar indiferentes énte esti procesu, calteniendo
siempres la perspeutiva de lo que ye esti Estáu y les sos instituciones: nin
más ni menos que’l guardián d’unes élites económiques que nos oprimen como
clase trabayadora, como nación, como muyeres, qu’esfarrapa’l nuesu mediu
ambiente, que mos reprime coles sos fuercies policiales, que nos multa por
protestar, que nos impón lleis de retayos sociales y precariedá llaboral…
Si dende un
principiu la llexitimidá d’esti réxime del 78 yera más que duldosa, güei queda
dafechu desacreditada, y ye por ello qu’enxamás vamos ver el planu
institucional nesti contestu dende otra perspeutiva que la de la tresformación.
Esti fechu nun supón que vayamos a
refugar mecánica ya incondicionalmente la participación moza nesti tipu de
procesos eleutorales: el contestu ye’l que determina la nuesa posición pa caún
d’ellos.
Nesi sen,
consideramos que les fuercies polítiques que dende la izquierda se presenten a
esti procesu eleutoral pela “circunscripción asturiana”, destaquen más poles
ausencies que poles inclusiones: falta una vegada más un calter netamente
asturianu nos procesos organizativos (marcaos como siempres por estructures
directives de fuera, y non polos tiempos y especifidaes propies), y falta un
proyeutu tresformador de y pa esti país llamáu Asturies , pa lo qu’habría que
principiar por reconocelu como suxetu políticu ensin les ambigüedaes calculaes
de programes y llemes que busquen más contentar a determinaos perfiles
eleutorales, que ser consecuentes con un discursu federalista qu’aveza a
repetir el viciu centralista “dende España haza los Pueblos”.
Si falten, ente
otros, esos puntos importantes, ye dende la nuesa perspeutiva por una cuestión
básica: porque hai que construyilos organizativa, teórica y práuticamente dende
la base, y nun vemos l’espaciu eleutoral como l’afayaízu pa convertir en
realidá lo que nun lo yera enantes. Asina, l’ausencia de candidatura propia de
la izquierda soberanista nestes eleiciones, namái amuesa la realidá d’un
espaciu políticu nel que podríemos falar de la convivencia de dos mentalidaes:
la del curtiu plazu, y la que mira más lloñe.
Nun somos ayenos a
l’apueste tanto dende individualidaes como dende coleutivos de la izquierda
soberanista por aquelles candidatures de vocación estatal que-yos pudieron
paecer “menos males”, pero dende’l
respetu a eses estratexes, paécenmos curtioplacistes, de constante y errónea fuxida p’alantre. En tou
casu, creyemos que’l camín ye distintu, y nun pasa por insistir en siguir
perdiendo tiempu y esfuerzu nes estratexes entristes que, como un bucle ensin
fin, van repitiéndose en distintes versiones a lo llargo los años y los
procesos eleutorales, con duldosu ésitu. Tampoco son menos curtioplacistes
otres postures que, ensin presentase a les eleiciones, nun amuesen un cambéu de mentalidá nes formes y el
fondu.
Pela nuesa parte,
siguimos enfotaes y enfotaos, xunto a otres compañeres y compañeros que
trabayen dende diversos coleutivos, nel camín que quier y debe mirar más lloñe:
na necesidá de construyir un espaciu políticu xunitariu y autónomu de la
izquierda soberanista asturiana, que nun primer términu sirva p’afitar y
desarrollar un proyeutu ideolóxicu, estratéxicu ya incluso estructural común, y
en segundu llugar lleve a la práutica esos consensos na cai y nos espacios de
llucha dende una perspeutiva de movimientu. Ehí ye onde Darréu quier tar,
apurriendo la so visión sobre les problemátiques de mocedá, puxando pol apueste
pol socialismu como proyeutu necesariu p’Asturies, treslladando propuestes
tresformadores y de país a la mocedá asturiano, etc.
Pa la Mocedá
d’Izquierda Soberanista, ensin avanzar per esi camín, paeznos que tienen pocu
interés estes eleiciones nes qu’Asturies, de nueu, va ser un convidáu de
piedra, y les problemátiques de la mocedá asturiano van siguir ensin una solución
que namái vamos algamar dende la organización popular, la llucha diaria, y el
trabayu alrodiu d’una riestra reivindicaciones concretes totalmente escaecíes polos
partíos representativos.
Ye por ello que nun
llamamos al votu pa nenguna candidatura, y sí facemos un llamamientu dende la
mocedá a los y les soberanistes d’Asturies, pa fortalecer esi otru camín que
mira lloñe, con independencia de los resultaos asoleyaos el propiu 20
d’avientu. A siguir ganando na cai lo que nun nos van regalar dende nenguna
institución d’esti Estáu.
No hay comentarios:
Publicar un comentario