Dende la institución estadística asturiana,
SADEI, vienen d’asoleyase dos trabayos d’interés con datos rellativos al 2014.
El primeru d’ellos son les estadístiques de la industria asturiana, y los datos
nun son precisamente positivos en cuantes a la evolución del empléu: dende
2008, la industria d’Asturies perdió más de 13.000 puestos de trabayu,
asitiándose dende los 63.059, fasta los poco más de
49.000. Nesi sen, destaca la mengua en seutores como la minería (más de 1.000
puestos perdíos), les industries alimentaries (más de 1.500 puestos menos), la
metalurxa (mengua en más de 2000 emplegos), siendo tamién considerable n’otros
como la fabricación de mueble, maquinaria, o industria testil.
Too esto lo qu’amuesa, nun ye otra cosa que lo
que vemos tolos díes: pieslles d’empreses, deslocalizaciones, EREs, temporalidá
y precariedá, y sobre too: desmantelamientu industrial. Asturies cada día cunta
con menos industria, menos puestos de trabayu, y menos oportunidaes de que la
mocedá puea vivir y trabayar nel so país. Pero esto nun va importar nin a una
patronal esmolecía namái pol so bolsu, nin por unos dirixentes políticos
asturianos títeres de les élites polítiques y económiques españoles. Namái el
pueblu salva al pueblu.
Rellacionao con esto, pero nun estudiu distintu,
el mesmu SADEI asoleyaba’l so trabayu sobre los movimientos migratorios
n’Asturies en 2014: 16.941 persones emigraron del nuesu país nesi añu según
esti estudiu, cifra esmolecedora de por sí al ser la más alta de lo que va de
sieglu según esti trabayu, pero más entá cuando vemos que la inmensa mayoría
correspuende a xente mozo, rumbu en gran parte a otros puntos del Estáu
español, y unes 6.000 persones fuera de les sos llendes. Too ello emigraciones
a fin de cuentes, unes 40 acaldía.
Dende Darréu creyemos polo tanto qu’estos datos
tienen que valer pa que’l pueblu asturianu, y n’especial la mocedá, nun escaeza
que n’Asturies eso de la “recuperación”, de la fin de la crisis, ye ciencia
ficción: llevamos décades en crisis permanente, en constante desmantelamientu
industrial, avieyamientu demográficu, despoblamientu de les villes y pueblos, y
en definitiva falta d’un futuru dignu nel nuesu país.
La Mocedá d’Izquierda Soberanista tenémoslo
claro: la organización y la llucha pola soberanía y el socialismu son les
ferramientes fundamentales coles que conquistar esi futuru que mos quieren
negar. La economía, como’l restu d’aspectos de les nueses vides, nun pueden tar
nes manes de los nuesos verdugos: ye la hora del pueblu, de la clase
trabayadora, d’Asturies.
NUN EMIGRAMOS
#FuturuNasturies
No hay comentarios:
Publicar un comentario