¡Titiriteros llibertá!

 

 

Dende ¡Asturies en pie! queremos amosar la nuesa solidaridá colos dos artistes de la compañía “TÍteres desde Abajo”, encarcelaos pola Audiencia Nacional. Según el xuez Moreno, los actos violentos de les marionetes "pueden constituyir un delitu d'enaltecimientu del terrorismu". L'autu pol que se decreta la prisión preventiva pa los titiriteros resalva'l contestu nel que se producen los fechos. Na so actuación, el xuez Ismael Moreno dexa de llau que se tratara d'una obra teatral satírica pa señalar a los dos deteníos como responsables de los delitos que na ficción asoceden.

Paez una chancia del destín qu'una obra que precisamente intentaba dar lluz satíricamente sobre les manipulaciones y los montaxes y la criminalización de les idees y de la protesta social, fuera víctima precisamente d'eso, d'una manipulación mediática, xudicial, policial y política, cuatro n'un!. Pero les que lluchamos sabemos que'l destín nin esiste nin gasta chancies, nada ye porque sí. Ye bien antigua la estratexa del poder de manipoliar la opinión pública, de criminalizar a les que lluchen y dividinos, y ye bien antiguu'l so deséu de tenenos bien callaes, sumises, y si non ente rexes. Eso ye daqué que tenemos que tener presente, lluchar por que nun sían capaces de callar la nuesa voz, d'apagar les nueses ganes de camudar la coses y de glayar la verdá al altu la lleva. Nun van ser quien a callanos.

A lo llargo d’estos últimos años son munches la compañeres represaliaes, dende les trabayadores na llucha polos sos derechos, a les solidaries coles persones desanunciaes, al movimientu llibertariu en sí, o les antifascistes, o los colectivos sociales mas contestatarios; nun fai fata mas que mirar estes selmanes con una montonera detenciones rocambolesques en distintes partes del estáu. Nun se trata de nada nuevu nin de simples zancadielles a l'alcaldía de Madrid o la ciudá de turnu, non (anque tamién); ye la so persecución de la respuesta social de siempre reforzada a lo llargo d’años pola implantación totalmente normalizada nel contestu políticu y social de la “Teoría de los entornos”. L'inventu que tantos frutos dio a la derecha del estáu, pero tamién a la supuesta esquierda parlamentaria, que cuando nun yera responsable directa, otorgaba col so silenciu (aquellos platos págense agora). Eso ye lo que nun quieren que se sepa, eso ye lo que quieren callar zarrando a estos compañeros, ye nuesu deber de solidarizanos con ellos y esparder la verdá.

¡LLIBERTÁ TITIRITEROS!

Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, ESPACIU LA LLEGRA, DARRÉU, MIERES EN LLUCHA