Soberanía p'algamar un #FuturuNasturies

La mocedá asturiano llevamos años y años diciéndolo, reivindicándolo y denunciándolo: la desindustrialización, el paru, la precariedá, la imposibilidá d’acceder a una vivienda y en definitiva a tolo necesario pa poder emancipanos nunes condiciones dignes, nun mos dexen más camín que la emigración, con un ermu social, demográficu, políticu, cultural… como consecuencia lóxica de too ello.

Recientemente un estudiu universitariu concluyía la necesidá “d’atraer pareyes moces” a Asturies, debío ente otres coses a la insostenibilidá de l’actual tendencia demográfica. Sicasí, dende la Mocedá d’Izquierda Soberanista entrugámonos: ¿hai dalgún tipu de voluntá política de desendolcar midíes que permitan a la mocedá asturiano vivir dignamente nel so país? ¿Qué se fizo p’aparar la sangría, o pa consiguir que retornen a Asturies  toles persones emigraes forciadamente? ¿Ye viable y posible facelo por parte d’unes instituciones asturianes inoperantes por voluntá propia?

Dende Darréu tamos mui d’alcuerdu en qu’esta Asturies centralista, sumisa, con un autogobiernu bien feble, ye inviable dafechu. Precisamos de polítiques de reindustrialización, de defensa y potenciación de los seutores económicos tradicionales, d’una profunda ameyora del tresporte públicu que permita vertebrar toles zones del país, de planes de trabayu públicu estable y de calidá, d’ayudes que permitan a la mocedá acceder a una vivienda… y pa too ello, hai una ferramienta fundamental: soberanía.

Namái avanzando haza una Asturies soberana vamos tener la capacidá, l’enfotu, y el poder necesariu como pueblu trabayador pa poner fin al escuru futuru al que mos conderga’l capitalismu y les sos ferramientes de dominación, como l’Estáu español o la Xunión Europea. 

Esiximos #FuturuNasturies, y vamos siguir lluchando por facelu realidá.