Dos imaxes xuntes valen más que mil pallabres.
Según l’informe sobre’l comerciu esterior d’Asturies
nel I trimestre d’esti añu, recién asoleyáu por SADEI, el principal gastu en productos importaos
correspuende a la hulla, el carbón, con más de 111 millones d’euros nos trés
primeros meses de 2016.
Casi al mesmu tiempu, tamién SADEI asoleyaba
los datos de producción de carbón n’Asturies durante l’últimu trimestre, con 91.804
tonelaes d’hulla estrayíes, y 211.056 d’antracita. Si contrastamos estos datos colos del primer
trimestre de 1996, vemos cómo d’aquella yeren 783.162 les tonelaes d’hulla, y
522.123 d’antracita, o lo que ye lo mesmo: güei producimos 692.000 tonelaes
menos d’hulla que va venti años, y 311.000 tonelaes menos d’antracita.
Estes cifres, anque fríes y dures, nun faen más
qu’amosar lo que mos trae’l desmantelamientu programáu de seutores como la
minería, xunío a la falta de soberanía política y económica cola que planificar
y desendolcar el país alcordies coles nueses necesidaes y especifidaes: un país
que pieslla les mines, demientres importa carbón manchao de sangre y esplotación
de países como Colombia, al traviés de fondos y corporaciones carroñeres como
Goldman Sachs.
Al mesmu tiempu, ún de los grandes destinos d’esi
carbón, son les centrales térmiques que mos envelenen, pa la producción d’una
lletricidá escedentario que s’esporta a otros puntos del Estáu español, ensin
qu’equí quede más que la contaminación. Nin industria, nin puestos de trabayu,
nin un seutor enerxéticu al serviciu del nuesu pueblu: lo único que queda equí,
ye la miseria.
Piesllen les mines, desmantelen les
industries, y conderguen a la mocedá al paru, la precariedá y la emigración,
demientres los nuesos recursos y la nuesa economía queden somorguiaos a
intereses nacionales y de clase ayenos a los del pueblu asturianu. Ye por ello
que nun tenemos qu’escaecer el camín p’algamar un #FuturuNasturies: soberanía
política y económica, pa la que ye imprescindible superar el caducu sistema
capitalista, poner en valor Asturies como suxetu políticu, y destacar la importancia
d’una mocedá que tien que ser motor de llucha. O lluchamos, o van siguir
obligándonos a colar.
Nós tenémoslo claro: ORGANIZACIÓN Y LLUCHA.
SOBERANÍA P’ALGAMAR #FuturuNasturies
No hay comentarios:
Publicar un comentario