Como llevamos tiempu denunciando, la emigración forciada de la mocedá
ye un fechu que nun podemos dexar de llau cuando falamos de la realidá
política y social d’Asturies. Y ye qu’el motivu de la mesma ye la falta
de perspectives llaborales, consecuencia d’una crisis capitalista que
n’Asturies lleva afitada delles décades yá. Dende los entamos de la
falsa “reconversión industrial”, que supuso’l desmantelamientu de la
minería, la industria naval, la siderurxia, etc., tamién fuimos testigos
del amenorgamientu de los sectores tradicionales como l’agricultura y
la ganadería. Too esto causó un alarmante ascensu nes cifres del
desemplegu asturianu, muncho más llamativu nel casu de la mocedá.
Nes zones rurales, xunto col declive de les actividaes que solíen
protagonizar l’actividá económica, vimos el declive n’influencia de les
polítiques empobinaes a la mocedá. El zarru de les escueles rurales, por
exemplu, implicó que cientos de neños tuvieren que desplazase a los
núcleos urbanos a cursar la educación obligatoria, ensin facilita-yos
nengún tipu de transporte en munchos de los casos. Una vez l’escolín
entama nel colexu na ciudá, sigue l’institutu y los estudios superiores
ehí, y yá ye precisamente onde busca’l so futuru, descartando dafechu la
vida nos pueblos, condergada a la desapaición.
Pero nes zones
urbanes el futuru nun ye meyor nin más claru. Nun mercáu llaboral con
una tasa de paru cercana al 20%, los mozos y moces del país son los que
más dificultaes tienen a la hora d’atopar un primer trabayu y los que
suben esta cifra a más del 50%. Y cuando atopen esi trabayu,
caracterízase pola inestabilidá, la esplotación, les desigualdaes de
xéneru y la precariedá.
Nesti contestu, tanto los mozos que
colaron de les zones rurales pa probar suerte nes ciudaes, como los
mozos urbanos, ven nel so abanicu de posibilidaes trés úniques
alternatives: paru, precariedá o emigración. Esta última ye una de les
principales problemátiques asturianes anguaño, yá que cerca de 40 mozos y
moces colen tolos díes a la gueta d’un trabayu, qu’en munchos de los
casos nun tien por qué ser meyor. La consecuencia d’esto ye una Asturies
avieyada y con poques perspectives de futuru.
Y la única
solución pa esta situación ye la soberanía. La falta de polítiques
qu’atiendan pa les nueses necesidaes, el sucursalismu y la subordinación
permanente a estructures como l’Estáu Español o la Xunión Europea,
conderguen a Asturies a esta llaceriosa situación que nun ve otra igua
que la soberanía política y económica. Ye necesario que seya la clas
trabayadora asturiana la que garre les riendes del nuesu destín,
atendiendo a les nueses especificidaes como pueblu, y que construya’l
socialismu pa tener futuru nel nuesu país, ensin tener qu’emigrar, y
ensin tener que ser oxetu de nengún tipu d’opresión, yá sea nacional, de
xéneru o de clas. Porque namás una Asturies feminista, socialista y
soberana tien la llave del nuesu futuru, nun vamos parar de glayalo nes
cais. Lo concienciación de la mocedá ye un arma indispensable pa la
construcción d’una sociedá meyor.
Na semeya, un mural fechu en
Sama (Llangréu) nel día d’ayeri, como parte d’esta campaña permanente escontra la
emigración forciada de la mocedá.
No hay comentarios:
Publicar un comentario