Un estudiu reciente d’ESADE y InfoJobs asegura qu’el númberu de
muyeres con un sueldu per baxo de los 1000€ nel Estáu Español duplica al
de los homes. Esta brecha salarial caltiénse si consideramos los
sueldos superiores a los mil euros, pero si’l porcentaxe decrez ye
porque asina lo fai’l númberu de muyeres. Del mesmu mou, los trabayos
exercíos pol sexu femenín -dientro de la propia precariedá de mercáu
llaboral d’anguaño- son aquéllos con menor responsabilidá y mayor inestabilidá.
Esta situación d’inferioridá nel ámbitu del trabayu somete a la muyer a
una dependencia económica respecto al home na familia heterosexual,
asegurando asina la persistencia del sistema de valores establecíu pol
patriarcáu, según el cual l’home ye’l que mantién a la familia, y la
muyer la que tien asignaes les tarees doméstiques y de neños.
Nesti mesmu estudiu, tiense en cuenta tamién la situación de la mocedá,
onde casi la metá de los menores de 25 años emplegaos nel Estáu
Español, nun llega a cobrar un salariu de 1000€. Ye lo qu’atopamos como
moces y mozos, tanto n’Asturies como nel restu del Estáu: precariedá,
inestabilidá, salarios indecentes y desigualdá. La consecuencia d’esta
situación, acaba siendo la emigración forciada a otros llugares onde nun
necesariamente van atopase meyores condiciones.
Vemos polo
tanto, que les moces asturianes somos oprimíes como asturianes, como
trabayadores y como muyeres, pero tamién como parte del colectivu mozu
pol qu’el nuesu país nun puxa de nenguna manera. Sicasí, tamién sabemos
cuál ye’l camín a siguir: llucha, llucha y más llucha. Auto-organizase
en colectivos de trabayadores y lluchar polos nuesos derechos
llaborales, puxar por un modelu de producción propiu que tenga en cuenta
les nueses especificidaes como pueblu, sofitar les redes de consumu
cercanes, etc. Lluchar pola soberanía, porque ye l’únicu camín pa
dignificanos como muyeres, como asturianes y como trabayadores.
No hay comentarios:
Publicar un comentario