El 17 de mayu ye un día bien reivindicativu a nivel internacional, y ye que foi nesa fecha del añu 1990 cuando la Organización Mundial de la Salú suprimió la homosexualidá de la so llista d'enfermedaes mentales.
Pesie a los avances algamaos pola llucha del movimientu LGTBi, ye una realidá qu'entá son munches les situaciones de discriminación, violencia o marxinación les que viven les persones que visibilicen la so condición, y d'ello nun escapa la mocedá: les evidencies amuesen que n'etapes como l'adolescencia, el gráu d'hostilidá pa coles persones LGTBi llega a niveles bien esmolecedores.
Ante ello, ye una necesidá que dende Asturies se siga faciendo por visibilizar y reivindicar lo que ye de xusticia, lo que debería ser visto como daqué común y normal na nuesa sociedá, pa que los avances nun queden en cuestiones formales, sinon que tamién les conciencies medren haza la fin de los prexuicios y les fobies.
Ensin una sociedá llibre de fobies y opresiones de tou calter, nun vamos ser quien a construyir l'Asturies a la qu'aspiramos dende la Mocedá d'Izquierda Soberanista. Ye por ello que nesti día, ye obligación glayar NON A LA LGTBiFOBIA.
No hay comentarios:
Publicar un comentario