Porque nun tenemos que vivir pa trabayar, muncho menos tenemos que morrer por ello

Ayeri la clas trabayadora asturiana perdía un trabayador a primer hora de la mañana nos astilleros de Ferrol. Un representante de la Confederación Intersindical Galega denunciaba nunes declaraciones la precaria situación de los trabayadores de les subcontrates d’esti sector, que son oxetu d’una descarada esplotación llaboral, con xornaes de llunes a domingu que superen les diez y once hores diaries.

Poques hores dempués, otru trabayador asturianu mancábase nel Musel de Xixón y yera treslladáu al hospital n’estáu grave. Nun son poco frecuentes los accidentes llaborales nel Musel, y no que va de sieglu yá morrieron nes sos instalaciones cuatro trabayadores, siendo l’últimu un mozu llangreanu va malpenes dos años.

Estos accidentes llaborales nun son nenguna casualidá, sinón que van de la mano de la precariedá, la baxada de salarios, l’aumentu d’hores selmanales, la falta de medíes de seguridá, etc. Esta ye la base d’un sistema capitalista basáu na esplotación del obreru y na reducción de costes col oxetivu de medrar los beneficios de la patronal. Nesti xuegu, les muertes de los trabayadores son un meru dañu colateral que non sólo nun afecten a los bolsos del patrón, sinón qu’aseguren que se caltenga la so tasa de ganancia.

Dende Darréu, queremos dar el nuesu apoyu a los familiares de los trabayadores, asina como denunciar una vegada más la brutalidá a la qu’esti xabaz sistema nos conderga como parte de la clas trabayadora asturiana. La meyor manera de dignificar a los que son oxetu del terrorismu patronal, ye siguir na llucha pa valtiar el capitalismu. Porque nun tenemos que vivir pa trabayar, muncho menos tenemos que morrer por ello.

¡Puxa la llucha de la clas obrera!