Nes últimes selmanes tamos viendo cómo la
ofensiva contra los gobiernos progresistes de llatinoamérica medra de contino,
con procesos qu’anque en cierta manera garren formes distintes a décades atrás,
busquen los mesmos oxetivos: el regresu del neolliberalismu que tanta miseria
traxo, y de la so mano la sumisión de los pueblos a los intereses d’EE.XX y l’imperialismu.
Nesi sen, los casos de Brasil y Venezuela son los más destacaos, ensin escaecer
lo que ta pasando n’otros estaos como l’arxentín, cola torna al poder de la
drecha y les sos polítiques antipopulares.
El casu brasileñu queda perbién resumíu cola
composición d’un gobiernu d’homes, blancos, ricos, y enllenos de corrupción, que
col so golpe de baxa intensidá busquen entainar coles contrarreformes que
favorezan a la oligarquía énte la mayoría social. Y el casu venezolanu, non por
yá conocíu, dexa de ser grave y bien rellevante, con una xabaz y golpista
derecha sofitada a nivel internacional dende estaos como l’Español, onde va
pocos díes el PSOE de Siero convidaba con tolos honores institucionales al pá del
golpista Leopoldo López.
Dende Asturies nun queda otra que reforzar el compromisu
antiimperialista, porque como bien queda demostrao, les oligarquíes siguen
espeyando en tolos países el so calter antidemocráticu, como antidemocráticu ye’l
so sistema capitalista y la esplotación, la fame, la precariedá y la represión
que trae embaxo’l brazu.
Esi antiimperialismu ya internacionalismu, pa
nós va venceyáu a la denuncia del papel d’esti Estáu español nel que nos
atopamos, como parte que ye d’esi engranax reaccionariu dientru y fuera de les sos llendes. Paeznos en
consecuencia que la superación d'esti marcu y la salida de les estructures
imperialistes (OTAN, XE, Reinu d'España) ye una necesidá hestórica p'Asturies y
el so futuru. Nun podremos vivir en paz, con xusticia social y en llibertá
mentantu teamos baxo la bota imperialista, y ye por ello imprescindible la
llucha pola soberanía de los pueblos, y la construcción d’otru orde socioeconómicu.
FUERA LES GARRES IMPERIALISTES DE LOS PUEBLOS
MOCEDÁ ASTURIANO, MOCEDÁ INTERNACIONALISTA
No hay comentarios:
Publicar un comentario