Esti 5 d'ochobre ye un nuevu aniversariu de la Revolución Asturiana de 1934, concretamente'l 79 aniversariu de lo que foi la cabera revolución obrera n'Europa. Fai 79 años la clas obrera asturiana tomó les armes y algamó controlar el poder dende'l 5 d'ochobre hasta'l 18 del mesmu mes. N'Uviéu proclamose la República Socialista Asturiana y en munches zones del país la produción o el consumu ficiéronse alcordies a los principios revolucionarios. La mocedá foi un motor fundamental p'aquella Revolución Social protagonizada pol Pueblu Trabayador Asturianu.
Güei, dende la Mocedá d'Izquierda Soberanista -Darréu- queremos facer alcordanza d'estos paisanos y miranos nesti acontecimientu hestóricu d'enorme valir p'Asturies. 79 años dempués:
- Contra'l capitalismu, por ser un sistema que namái beneficia a una minoría que s'enriquez cada día más a costa d'esplotar a les clases populares y tien y tendrá una base inxusta. Pol socialismu como única alternativa al capitalismu que puede garantizar el bientar y progresu del Pueblu Asturianu y la humanidá sobre los principios d'igualdá, solidaridá y xusticia.
- Contra l'españolismu, por ser el xugu opresor que venceya de forma violenta y autoritaria a Asturies col Reinu d'España n'una relación d'imposición continua y autoritarismu. Pola Soberanía Popular Asturiana como garante d'una Asturies democrática, onde les decisiones qu'atañen a la nuesa nación seyan tomaes de manera soberana y llibre pol Pueblu Asturianu.
- Contra la esclavitú impuesta a la xente cola esculpia la crisis. Pola dignidá obrera como ferramienta de defensa contra los abusos de la patronal y la oligarquía.
- Contra la resignación impuesta al Pueblu Asturianu a base d'anestesia coleutiva y aculturización. Por una mocedá combativa que plante-y cara al poder foriatu y esplotador que malgobierna Asturies, yá seya dende Bruseles, Madríd o Uviéu. Por una mocedá que nun se rinda y lluche pol so futuru.
¡PUXA ASTURIES LLIBRE Y SOCIALISTA! ¡EL FUTURU YE DE NUESO!
No hay comentarios:
Publicar un comentario