“Coca-Cola Iberian”
tien previsto “reordenar” la so cadarma de plantes embotelladores na Península
Ibérica una vez fináu’l procesu de fusión de toes elles nuna única empresa.
Asina, la multinacional d’orixe norteamericanu va a zarrar instalaciones y
despedir a más de milenta persones, siendo la embotelladora asitiada en
Cualloto una de les que cunta con toles papeletes pal so pieslle.
Los 141
trabayadores de la factoría asturiana de Coca-Cola podríen perder el so puestu
de trabayu, cola consiguiente repercusión económica direuta ya indireuta que
supondría. Sicasí, dende Darréu camentamos que la verdadera cara de la compañía
nun ye la que mos amuesen nes sos millonaries campañes publicitaries pal llaváu
de la so imaxe, sinon la que pueden sufrir los trabayadores asturianos.
Asina, vemos cómo
Coca-Cola vien asesinando a sindicalistes alredor de tol mundu, despidiendo
ensin indemnización a trabayadores llatinoamericanos, financiando grupos armaos
p’asegurase’l control de recursos naturales, o emplegando procesos de
producción qu’atenten escontra la caltenibilidá ecolóxico –por exemplu: pa
producir un llitru de Coca-Cola, gástense más de 2 d’agua-. Poro, esta noticia
nun ye más que la esperimentación nel nuesu país de los atropellos que la
compañía desendolca a lo llargo de tol mundu, y que nun son esclusivos de so:
suponen una constante nel facer de les multinacionales d’esti sistema
capitalista.
Poro, ye
fundamental que la mocedá asturiano garre conciencia de que, detrás del
marketing y lo atractivo de la marca, nun hai más que paru, miseria, esplotación
llaboral y ecolóxico, y sangre. En definitiva, nun ye más qu’un reflexu de lo
que mos ufierta’l sistema capitalista, y ye por ello que dende Darréu
insistimos na necesidá hestórica de superar dichu sistema y avanzar haza la emancipación
social y nacional.
La doble vertiente
d’esta llucha reside en que nun ye namái un problema d’esplotación económico,
sinon qu’estes multinacionales xueguen tamién un papel fundamental na
globalización y la so uniformización cultural. Asimilar estes marques y los
vezos implícitos a elles supón avanzar haza la muerte de la diversidá cultural
n’Asturies y el restu’l mundu.
Nun hai
alternativa: la única forma d’acabar colos atropellos empresariales haza la
clase trabayadora asturiana, ye qu’esta algame’l control de la economía y, por
estensión, del poder políticu. Asina camudaremos paru por trabayu, miseria por
bientar, esplotación por igualdá y caltenibilidá; ya uniformización por diversidá
y autoestima como pueblu.
No hay comentarios:
Publicar un comentario