Darréu énte los últimos casos represivos n'Asturies

Nos caberos díes nel nuesu país foron deteníes delles persones, llegando cuasi a la decena, por tar na cai defendiendo los drechos sociales de toos y toes. Destacó ayeri vienres 13 d'avientu cuando siete persones foron deteníes por tratar de refugar un desahuciu en Xixón. Sindicalistes, persones solidaries o persones que defenden una alternativa política al Réxime de 1978 son perseguíes día tres día pola "democracia" española y los sos executores n'Asturies. Dende Darréu queremos amosar la nuesa solidaridá con toles persones que tan sofriendo esta escalada represiva.

Pa Darréu, la mocedá que cree na tresformación social y nacional, vamos entamar a vivir una auténtica escalada represiva n'Asturies nes prósimes selmanes y meses dedicada a tarazar a los movimientos sociales y políticos que lluchen contra los recortes y los abusos del capital y l'Estáu Español. La nueva Llei de Seguridá Ciudadana ye'l preséu perfechu que va emplegar la oligarquía española n'Asturies pa combatir la xusta y digna llucha de les clases populares en pro de la nuesa dignidá coleutiva y los nuesos drechos.

Poro, dende Darréu llamamos a la mocedá asturiano a lluchar teniendo en cuenta'l necesariu principiu de solidaridá y unidá contra la represión y les imposiciones que sofrimos. Los mozos y moces d'esti país tamién tenemos el deber d'echar abaxu la pernomada llei de segurida ciudadana o más conocía como "Llei Mordaza o Llei del Mieu". Amás denunciamos el papel cimeru de Gabino de Lorenzo, Delegáu de Gobiernu na represión, criminalización y persecución que ta viviendo'l movimientu popular n'Asturies.

¡TAMOS FARTES/OS DE REPRESIÓN!

¡NON A LA LLEI "MORDAZA"! ¡GABINO DE LORENZO DIMISIÓN!

¡PUXA ASTURIES LLIBRE!