La Mocedá d'Izquierda Soberanista quier faer alcordanza de la figura d'Andrés Manuel Solar Santurio nel XXIX aniversariu de la so muerte. Andrés Solar foi un de les figures cimeres del Surdimientu y ye ensín dulda una de les figures que más marcando al asturianismu y el soberanismu nel nuesu país. Andresu Solar nació n'El Fondón, na parroquia de Deva de Xixón un 25 d'agostu de 1955 dientru d'una familia de llabradores.
Depués de finar los estudios primarios entamó a trabayar na caseria y en 1978 entró nel movimientu de reivindación llingüística. Dende esta data trabayó la so obra lliteraria, destacando la xera narrativa pero tamién asoleyando obres d'ensayu y poesía. Dende qu'entamó esti llabor lliterariu foi reconocíu con dellos premios. Per otru llau Andrés Solar foi mayestru de llingua asturiana na Universidá Popular de Xixón al tiempu que trabayaba la tierra. Ocupó'l cargu d'ayalgueru n'Asociación d'Escritores Asturianos y foi miembru de l'Academia de la Llingua Asturiana. Tamién collaboró col grupu Xaréu Títeres de teatru.
Nel planu de reivindicación llingüística y nel ámbitu de la política foi un exemplu de trabayu y compromisu. Foi miembru de Conceyu Bable y depués de la Xunta pola Defensa de la Llingua Asturiana. Trabayo abondo n'asociación de vecinos del so pueblu y na Comisión de Fiestes de Deva. Militó na izquierda nacionaliega hasta la so tráxica muerte, formando parte del Ensame Nacionalista Astur. Con esti partíu presentose como diputáu a la Xunta Xeneral nes eleiciones de 1983. Muerre a los 29 años d'edá a causa d'un accidente de tráficu en Sotrondio. Dende 1985 la Xunta pola Defensa de la Llingua Asturiana fai alcordanza d'esti escritor y militante de la izquierda nacionaliega y la nuesa llingua colos Premios Andrés Solar.
Dende Darréu queremos recordar a Andrés Solar como una figura comprometía cola lliteratura, la nuesa cultura y llingua, el país y les clases populares. La mocedá que nun escaez ta en delda coles persones que aportaron el so granín de sable en pro d'otra Asturies y ye obligación de nueso envalorar la so aportación y tresmitir esti llegáu a les xeneraciones más moces. Anque Andresu Solar refugara dafechu del escesu de simboloxía dende Darréu creemos que ye pernecesariu dignificar siempre la nuesa memoria.
Pa finar Darreu quier desixir un mayor reconocimientu a l'Alministración Publica, principalmente al Principáu d'Asturies y l'Ayuntamientu de Xixón de la figura d'Andrés Solar. Esti escaezu paez consciente dafechu, yá que nun ye la primer vegada que la nuesa alministración, gobernada por sucursalistes, da-y la espalda a la figura y memoria d'esti llabrador de la Deva de Xixón.
No hay comentarios:
Publicar un comentario