Escontra la estafa de la lluz: nacionalización del seutor enerxéticu asturianu.

Dende Darréu queremos pronuncianos alredor de les señes qu’indiquen una xuba del preciu de la lluz en tol estáu español dende Xineru, nun porcentaxe entá por resolver pero que va a suponer un nuevu añadíu nuna factura que yá medró nos caberos años en más d’un 50%.

Dende la mocedá d’izquierda soberanista consideramos inalmisible una midida qu’afeuta direutamente una vez más a la cartera de la clase trabayadora asturiana, y que contribúi a empiorar les condiciones de vida nuna Asturies en situación d’emerxencia social, con cientos de persones con problemes o direutamente con imposibilidá de pagar el recibu de lluz, gas, (55 cortes al mes por parte de HC Energía), o en trámites de desahuciu (unos 200 casos anguaño).

Ye inalmisible amás por atopanos precisamente n’Asturies, un país carauterizáu por atopase tradicionalmente nos primeros puestos de producción enerxético nel estáu español, y que ye ampliamente escedentario na producción de lletricidá. Nesi sen, nel añu 2012 Asturies produxo 14.350 Gwh d’enerxía, frente a la so demanda de 10.103 Gwh (Datos de REE). Poro, Asturies consumió un 70,4% de la enerxía xenerada, destinándose polo xeneral el restu a la so esportación a otros puntos del estáu español non xeneradores d’enerxía. Hai que recordar amás qu’esti escedente enerxéticu llegó a algamar el 50% de la producción durante dalgunos años.

Denunciamos polo tanto l’usu d’Asturies como una colonia enerxética, de la que namái se beneficia l’estáu español nos sos intereses económicos estratéxicos, y empreses privaes del seutor que xestionen la producción, con especial mención a la dominante nel nuesu país, HC Energía. Ta amás la producción enerxética asturiana carauterizada pol predominiu de la xeneración mediante centrales térmiques, col carbón como principal motor nuna situación na que se piesllen les nueses mines, y s’importa carbón colombiano nel puertu xixonés pa la especulación y negociu de Goldman Sachs. El monocultivu enerxéticu asturianu nun xenera trabayu, nin xenera un recibu más baratu, nin sofita la industria estrautiva del país, nin favorez la producción del restu del seutor industrial: namái dexa equí’l desaniciu mediuambiental, y más probitú.

Poro, queda nidio lo inxusto d’una situación que tamién afeuta especialmente a una mocedá que nun puede emancipase, pola falta d’oportunidaes llaborales, la precariedá de les mesmes, o precisamente pola imposibilidá de facer frente a un alquiler/hipoteca y otros gastos como’l recibu de lluz o gas. Pa Darréu el camín ye la soberanía, que’l pueblu decida cómo y pa qué producir la so enerxía.

Ye imprescindible qu’Asturies ponga al serviciu del pueblu asturianu’l seutor enerxéticu, somorguiándolu a los intereses populares tanto na vertiente económica, como na ecolóxica. Que podamos beneficianos d’una nueva situación na que toos y toes podamos acceder al pagu de la enerxía, y que’l pueblu asturianu tenga la última pallabra sobre qué modelu enerxéticu desendolcar,  ye l’únicu camín col que dá-y la vuelta a la situación. 

Nesi sen, afitamos la importancia de que les reivindicaciones alrodiu de la nacionalización del seutor enerxéticu s’empobinen haza una perspeutiva soberanista, puesto que, como ta más que comprobao, la estatalización d’empreses nel actual marcu del estáu español nun igua los problemes de la clase obrera asturiana, sinon que sigue atendiendo a otros intereses ayenos a nós.

Nun queremos siguir siendo un simple productor nes manes d’España y el capital, ensin capacidá dala de decisión sobre los nuesos recursos, y la so repercusión na economía de les persones. Poro, el camín ye lluchar pola soberanía d’Asturies, encadarmada al traviés d’un sistema nel que’l pueblu trabayador asturianu tenga’l control de los medios de producción: el socialismu.