La pasada selmana faciase pública la Llei del Albuertu del Gobiernu de España, empobinada nesti casu pol ministru Gallardón. La nueva llei prohibe a les muyeres albortar, namái, según el testu llegal, podrá albortase en circunstancies estraordinaries, como en casos de violación y amás entiende el gobiernu del PP qu'esto ye una cesión d'esti gobiernu. L'anteproyeutu de llei ye un retrocesu nos drechos de la muyer de más de 30 años y ye una llei que ta fecha a la midía de la drecha más reacionaria y del catolicismu más integrista.
Dende Darréu, como organización de mocedá que somos, creemos que van ser precisamente les muyeres más moces les principales perxudicaes por esti ataque a los drechos de les muyeres. Agora namái van tener la posibilidá d'albortar les muyeres que puedan permitiselo economicamente, saliendo del Estáu, como en tiempos de la Dictadura Franquista. Ye pa solliñar el nivel d'hipocresía d'esti gobiernu corruptu, que vende la llei como una forma de protexer a les muyeres mentantu-yos ñega'l drechu a decidir sobre la so maternidá y la so vida. Nuevamente vemos el cinismu y lo antidemocráticu d'esti sistema, onde toes somos iguales hasta onde da la cartera, nin más nin menos.
Asina, dende la Mocedá d'Izquierda Soberanista d'Asturies llamamos a la mocedá a dar una contundente rempuesta social escontra les imposiciones de la ilesia y la drecha más rancia a les muyeres. Per otru llau, pidimos al gobiernín de Javier Fernández la non aplicación d'esta llei, entendiendo que nun ye asumir una llínia política concreta, sinon aceutar la ñegación d'un drechu de la muyer algamáu con muncha llucha y sudu.
Darréu sofita'l drechu de les muyeres a decidir llibremente sobre la so maternidá, el so cuerpu y les sos relaciones polo que nun queda otra que garantizar el drechu al albuertu llibre, gratuitu y en condiciones segures. La sanidá pública tien de recoyer esti drechu y garantizalo pa lo que ye indispensable que'l Principáu nun se convierta n'una fuercia cómpliz d'esti atropellu a la muyer.
¡ALBUERTU LLIBRE, SEGURU Y GRATUITU!
¡POL DRECHU A DECIDIR DE LA MUYER!
No hay comentarios:
Publicar un comentario