Refugamos la feria flamenquista en Llugones

La Organización de Mocedá d'Izquierda Soberanista DARRÉU quier tresmitir el so descontentu pola cellebración d'una "Feria d'Abril" en Llugones en plenu xunu. Agora llega al nuestru pueblu otru eventu d'estes carauterístiques, que paez que dende'l poder políticu y económicu tan tratando d'imponer a calzaor en tolos conceyos d'Asturies.

DARRÉU entiende que toles muestres culturales son respetables, pero creemos que nesti casu ta instrumentalizándose una cultural, andaluza nesti casu, pa imponer un modelu cultural foriatu n'Asturies venceyáu a la ideoloxía nacionalista española. Al tiempu vemos como toles nuestres señes d'identidá, como ye'l casu de la llingua, son reprimíes polos que manden nesti país y nun cuenten con nengún tipu d'apoyu.

Los mozos y les moces de conciencia creemos qu'en Llugones hai otres prioridaes culturales o sociales a la hora de prestar collaboración pública dende l'Ayuntamientu. La cultura de Llugones o del país asturianu viven una situación permala mentantu l'envís ye faer "feries d'abril", que nun son más qu'un intentu forciáu d'imitar un eventu asina enllenu de tópicos, incoherencies ya instrumentalización ideolóxica. Poro dende Darréu llamamos a la razón al Ayuntamientu y pidimos mayor responsabilidá a tolos collaboradores a la hora de sofitar esti tipu de disparates.

¡ Flamenquismu n'Asturies ye colonialismu cultural!
¡La mocedá en llucha pola so cultura!