Entrevista a AZARUG (Canaries) por mor de les prospecciones petrolíferes de REPSOL

Azarug ye la organización de la mocedá canario qu'apuesta firmemente pola lliberación nacional y social. Una organización cola que Darréu caltién dende hai años venceyos y que nun dexó de lluchar en nengún momentu pola dignidá de la mocedá d'esi país dende l'independentismu y el socialismu. Dende Darréu quinximos averar a la mocedá asturiano y el nuesu pueblu en xeneral la braera cara del conflitu que ta desendolcándose nel país canariu contra les propecciones petrolíferes que ta tratando de faer Repsol. Pa ello presentamos esta entrevista que mos concedieron dende Azarug, perinteresante pa conocer meyor la realidá de Canaries. 

-¿Cómo y cuándo entama’l conflictu de les prospecciones petrolíferes en Canaries?

Dende l’añu 1968 Marruecos tien autorizao delles esploraciones nes agües que separten esi país del Archipiélagu Canariu ensin que los resultaos iniciales conduxeren xamás a la fase d’esplotación.
A día de güei, concedieronse llicencies de reconocimientu o esploración marítima (off shore) para 250.000 km2; un área que duplica n’estensión la que’l Gobiernu d’EEUU concedió nel Golfu de México.
Pola parte española; los permisos d’esploración na zona foron otorgaos a Repsol en xineru del 2002 y tuvieron por rempuesta una protesta diplomática formal del Gobiernu marroquí relativa a la indefinición de les agües territoriales ente ambos Estaos; fechos qu’acontecieron solo unos meses enantes de la crisis de Perexil. De 2002 a 2004 realizáronse dalgunos sondeos, pero los drechos de Repsol foron suspendíos nel 2004 pol Tribunal Supremu a instancies d’una denuncia del Cabildu de Lanzarote, situación na que se mantuvieron fasta que tornaron a ser convalidaos pol Gobiernu español en marzu del 2012. Amás de lo anterior, y n’estrecha relación cola cuestión, en marzu de 2013 el Tribunal Constitucional desestimó’l recursu interpuestu pol Gobiernu de Canaries en 2008 escontra la Llei 12/2007 qu’otorgaba n’esclusividá al Estáu la competencia p’autorizar prospecciones o esplotaciones petrolíferes submarines nes agües baxo xurisdicción española.

-¿Qué supondría pal pueblu de vueso que se llevare alantre esti proyeutu de Repsol?

 
Los peritos denunciaron les insuficiencies de los informes d’evaluación ambiental presentaos por Repsol y consideraron “xenéricos”, “incompletos”, “y en munchos aspeutos fasta erroneés” les xustificaciones aportaes polos promotores petroleros pa xustificar una supuesta inocueidá de les prospecciones so l’ecosistema de Canaries.
La propia empresa Repsol reconoció nun documentu qu’esiste riesgu de vertíu. Nel peor de los casos, podríen producise manches de crudo en Lanzarote, Fuerteventura y Gran Canaria, un “riesgu ambiental y social” real.
Podriase llegar a una situación na qu’aportaríen ente 40 y 70 gramos de petróleo por metru cúbicu d’agua a Lanzarote, Fuerteventura veriase más afeutada entá, con manches de 80-90 gramos por metru cúbicu.
En Gran Canaria, famoses y concurríes sableres como la del Inglés y Maspalomas, recibiríen ente 30 y 40 gramos por metru cúbicu d’agua de mar contaminá con petroleu. La marea prieta aportaría fasta la sablera de Las Canteras o la costa sur de Tenerife. Tamién la costa africana cuerre peligru.

-¿Cuál ta siendo’l papel del Gobiernu canariu en too esto? ¿Y cuál el papel del Ministru Soria?

El presidente de Canaries, Paulino Rivero, calificó de “cacicada” que’l Gobiernu autorizare les prospecciones de Repsol nes isles “col espediente entá abiertu”. Un cambéu de decisión oportunista al nuesu xuiciu pero que nuna llucha mediática como esta nun ta de más siempres que se dexe claro que nun ye la llucha de so nin la del so partíu, qu’ellos nun mos representen en res, pues son los mesmos caciques que critica.

El ministru d’Industria José Manuel Soria paez habese convertío nuna persona non grata pa una bona parte de los habitantes del Archipiélagu. Asina quinxeron manifestalo alredor d’un millar de persones el pasáu miércoles, nuna concentración de protesta convocada a traviés de les redes sociales pa espresar la so refuga a la visita del llíder del PP nes isles a Telde, convidáu pol grupu de Gobiernu municipal pa dar el pregón nes fiestes d’esta llocalidá.
Soria, pidió al Gobiernu de Canaries que mida les consecuencies de “arengar” a la población escontra les prospecciones petrolíferes cola utilización d’argumentos totalmente falsos y que dexe d’usar recursos públicos pa ello. Soria criticó que la televisión pública canaria abra de mena diaria los informativos emitiendo imáxenes que nun se correspuenden cola realidá de les prospecciones, asina como tamién pidió al executivu canariu que dexe de financiar folletos d’información que nun s’axusta a la realidá.

-En plena crisis socioeconómica del capital, ¿ta emplegando Repsol y les instituciones argumentos populistes pa desendolcar el proyeutu?

Por supuesto. El presidente del Cabildu de Lanzarote, Pedro San Ginés, declaró esta mañana que “Repsol falta a la verdá de forma sistemática, y dende llueu nun vamos permitir que, nestos tiempos d’enormes dificultaes onde prima de forma esceicional y perriba de too la defensa del interés xeneral, mos engañen dende una multinacional qu’aumentó l’añu pasáu sos beneficios privaos más d’un 20%”
Podemos recurrir al argumentu de qu’aleguen abrir 52.000 puestos de trabayu, cuando tando presentes en más de 30 paises empleguen 25.000 persones, menos de la metá que dicen ufiertar namás en Canaries…

-¿Cómo ta siendo la movilización escontra les prospecciones?, ¿T’abarcando a munchos seutores? ¿Hai marxe real de victoria so los intereses privaos de Repsol?

Les movilizaciones como tales tan resultando ser un ésitu, se tan llegando a concentrar muncha xente. Pero al paecer de nueso, debe haber más participación ente coleutivos al organizar, y tener claro fasta onde llegamos. De toos moos precisamente pola cuestión d’abarcar seutores paeznos que merez la pena dir relativamente sele. Cada vegada son más seutores llaborales o estudiantiles los que se xunen (damos por fecho que pola causa-efeutu de la crisis estructural capitalista). Creyemos qu’hai marxe si, la voz del pueblu se fai más fuerte, y cada vegada la xente ta más cabriada, ya se dieron incidentes de protesta violenta nel pasáu pregón de Soria en Telde, el so pueblu natal. Pero hai que siguir movilizando xente, el problema ye qu’hai munchu contratiempu que torga’l desendolque, como’l Mundial y la “Roja”, y esi tipu d’opios pal Pueblu.

-¿Qué modelu enerxéticu proponéis pal vuesu país? ¿En que difier col autual?

Nós apostamos poles enerxíes renovables, que por tener tenemos de sobra nel nuesu país. Maremotriz, eólica y solar principalmente. Nós nun queremos que Repsol se llargue de nueses agües porque sea Repsol, si nun ye Repsol sedrá otra transnacional. Nós nun queremos el piche, porque supón un riesgu pal mediu ambiente del nuesu archipiélagu.
Queda muncho por construir. Difier principalmente nel cambéu radical d’emplegar rescursos llimitaos y altamente puxaos, a emplegar recursos inagotables, que tol mundu podría tener, si non unu, otru. Nós podemos esfrutar principalmente de tres enerxíes renovables too l’añu. Lo qu’hai ye puru caciquéu, negocios millonarios baxo la mesa con transnacionales esplotadores y espoliadores.

- Dizse que les prospecciones van a la escontra del turismu canariu. ¿Tais a gusto col modelu turísticu canariu? ¿Afeuta esti turismu de dalguna forma a la vuesa cultura ya identidá nacional? ¿Prestaríavos camudar esti modelu turísticu?

Ye una entruga complicada, y nun m’atrevo a llanzar un veredictu en nome de la mio organización, pues habrá quien tenga diferencies por ínfimes que seyan. Pero creyo que dende la perspeutiva coleutiva de canariedad y revolución científica que llevamos per delantre, ye evidente que’l turismu tien una consecuencia negativa notable. Y ye que los turistes son como les abeyes, dan miel pero piquen. L’esfarrape de barrancos y costes pola construción d’hoteles ye namás un exemplu, construyeron centros comerciales turísticos enriba de yacimientos arqueolóxicos. Les constructores y el Gobiernu nun tienen respetu por nada de la cultura canaria, y muncho menos a l’ancestral, la prehispánica. Na mio isla, en Gran Canaria, al sur d’esta hai una ciudá turística nomada Maspalomas onde hai de too, chigres, clubes, pubes, burdeles, moteles, hoteles…como Cuba con Batista digo yo. Y claro, nun ye que se vean munches señes d’identidá canaria, más bien muncha bandera española en diversos puestos mercantiles dientro de recintos o fuera. Creyemos que’l turismu nun ye malu si ye controláu, pero lo que nun pue ser ye que s'apliquen el mesmu sistema monocultuvista propiu de colonies, que se mos lleva aplicando dende que mos conquistaron. Agora’l turismu ye lo que “nos da de comer”, esplótase'l terrenu y equí nun pasó res. Sí, prestaríamos camudalo, por daqué más sano, más respetuoso cola nuesa cultura y el mediu ambiente de nueso.

-¿Cómo podéis definir la relación Canaries-Estáu español? ¿Creyéis qu’esiste realmente una relación de neo-colonialismu? ¿Por qué?

La relación de Canaries col Estáu español, esa cárcele de pueblos, ye la de Colonizáu-Colonu. Y güei puedese tastiar como nun se tastiaba dende’l sieglu pasáu, colo del petroleu.
Al ver como la nuesa voz intenta ser inorada dafechu. Neocolonialismu ye lo qu’había na India cuando “colaron los ingleses”, que la burguesía hindú nun yeren más que títeres. Equí dase un casu particular, dau que nes instituciones gubernamentales hai canarios criollos, pero’l poder, que braeramente reside nes corporaciones, osea nes empreses, nes cuáles los presidentes y/o principales aicionistes son godos. ¿Qué por qué? Pues eso prestaríamos saber. Damos por fechu motivos hestoricos de que ye’l fetiche de toa nación imperialista por tener dominios y posesiones onde espoliar y aculturizar. Más con “España, l’imperiu onde nun se ponía’l sol”

-¿Qu’opináis sobre los caberos movimientos políticos a nivel del Estáu Español que se dieron a raíz de les eleiciones europées? ¿Consideráis que Canaries debe salir de la XE?

Preferimos nun dicir muncho de partíos y tal pa nun facer nin campaña nin desprestixu. Pero creyemos que la cosa se tá caldiandose bastante, a lo menos como se ve dende equí.
Si, principalmente debemos salir porque nun somos nin Europa, tamos fartos d’esi eurocentrismu ranciu. Cualesquiera que garre un mapa ve que somos africanos, del noroeste d’África. Atlánticos tamién pa dalgunos. Pero non européos. Por nun falar de que salir de la XE ye una prudencia más que ná. Nun creyemos que se pueda arreglar res ehí, nin la Troika nin Merkel nin naide mos va a conceder la independencia, porque nun podemos esperar que naide mos conceda res, y tenemos de ser dueños del nuesu destín, la independencia tómase pola fuercia.

-¿Cómo se percibe la realidá asturiana dende’l vuesu archipiélagu? ¿Conocéis les lluches que se tan dando nel nuesu país?

La verdá que polos medios d’información capitalistes ye difícil tener información veraz de les lluches que se tan llevando a cabu na vuesa tierra, siempres s'intenta tresmitir una imaxe d’una Asturies verde, cuna del Principáu qu’enxamas suel tener problemes fuera de los “conatos” mineros, mientres que polos medios alternativos, somos capaces de ver que ye otra la realidá que se vive y hai una llucha bastante fuerte pola soberanía nacional. En cuanto a les lluches que se tan dando por Asturies, somos conocedores d’un focu importante pola oficialidá del Asturianu como parte fundamental de la reivindicación nacional.

Munches gracies a AZARUG, la mocedá independenista canario por concedenos esta entrevista y averar al país de nueso la realidá del conflictu del petroleo en Canaries.